Verknámshúsið stækkað
Mikil ánægja er í Skagafirði þessa dagana því nýlega skrifuðu Inga Sæland mennta- og barna- málaráðherra, Sigfús Ingi Sigfússon, sveitarstjóri Skagafjarðar og Selma Barðdal Reynisdóttir, skólameistari Fjölbrautaskóla Norðurlands vestra, undir vilja- yfirlýsingu um stækkun verknámshúss skólans.
Í dag eru nemendur skólans um 800 og hefur áhugi á verknámi alltaf verið mikill í skólanum. „Við erum himinlifandi að hafa undirritað viljayfirlýsingu um viðbygginguna. Það er ansi þröngt hjá okkur og hefur verið mjög lengi. Í verknámshúsinu kennum við rafvirkjun, húsasmíði, vélvirkjun og vélstjórn. Við kennum rafvirkjun í gámi og inni á gangi í bóknámshúsinu og í mjög litlu og þröngu rými í núverandi verknámshúsi. Of lítið pláss er almennt í kringum allar vélar og við getum ekki boðið nemendum og kennurum upp á eðlilegar vinnuaðstæður. Við höfum einnig verið að kenna bifvélavirkjun en kennslan fer að miklu leyti fram í húsnæði Bifreiðaverkstæðis KS út af plássleysi,“ segir Selma skólameistari.
Selma segir að í hönnuninni sé gert ráð fyrir fjölnotarými sem á að nota í ýmislegt, t.d. kennslu í bifvélavirkjun og jafnvel múrverki og pípulögnum. Kvikmyndagerðarbraut skólans vantar líka töluvert meira pláss.
„Það er mikill áhugi á okkar upptökusvæði og víðar á verknámi, en svo hefur verið stöðug aðsókn fólks alls staðar af á landinu í helgarnám í iðngreinum,“ segir Selma aðspurð um áhuga á verknámi við skólann. Hönnun á fyrsta áfanga lýkur á haustdögum og stefnt er á flutning í þann hluta ári síðar.
„Við erum ákaflega þakklát, bæði Sveitarfélaginu Skagafirði sem tekur að sér að halda utan um verkefnið fyrir sveitarfélög á Norðurlandi vestra í samræmi við lagaheimildir og mennta- og barnamálaráðuneytinu fyrir að treysta okkur fyrir þessu. Það er ekki sjálfgefið að eiga jafn styrkan bakhjarl og sveitarfélagið er en við trúum því að með þessu móti getum við lokið framkvæmdum hraðar og ódýrar en ella,“ segir Selma.
