Sameining Arla og DMK Group samþykkt
Samkeppnisyfirvöld Evrópusambandsins hafa samþykkt samruna afurðarisanna Arla í Danmörku og DMK Group í Þýskalandi.
Samruninn var samþykktur skilyrðislaust með þeirri athugasemd að sameining fyrirtækjanna hefði ekki teljandi áhrif á samkeppni á mjólkurvörumarkaði á evrópska efnahagssvæðinu. Sameinað fyrirtæki er nú fjórða stærsta mjólkurbú í heimi og það stærsta í Evrópu. Fyrirtækið nær til 11.200 mjólkurbænda í sjö löndum Evrópu með um 19,4 milljarða lítra af mjólk til að vinna úr.
Arla og DMK Group gerðu samning um sameiningu fyrir tæpu ári síðan. Síðan þá hefur sameiningin verið skoðuð af samkeppniseftirliti Evrópusambandsins.
Sameinað fyrirtæki mun vera með höfuðstöðvar í Danmörku og framleiða undir merkjum Arla. Arla og DMK Group framleiða mjólkurvörur fyrir evrópskan markað til dæmis ferska mjólk, smjör, jógúrt, rjóma og ost.
