Hvatt til meiri matvælaframleiðslu

Sænskir bændur gætu framleitt mun meira af landbúnaðarafurðum en þeir gera í dag, skapi stjórnvöld betri skilyrði.

Þetta kemur fram í nýrri skýrslu frá Lantbrukarnas Riksförbund (LRF, sænsku bændasamtökin), sem vefmiðillinn Land.se greinir frá. Skýrslan sýnir að framleiðslugeta í mörgum greinum er langt umfram núverandi nýtingu, en pólitískar ákvarðanir og reglur hamla vexti.

LRF telur að hægt sé að auka framleiðslu í allmörgum landbúnaðargreinum um 10-14% og að framboð landbúnaðarafurða geti aukist úr 57% í allt að 80% fram til ársins 2035

„Við höfum sett okkur hærri markmið en Jordbruksverket (Sænska landbúnaðarstofnunin), sérstaklega í framleiðslu dýraafurða,“ segir Palle Borgström, formaður LRF. Hann bendir á að Svíþjóð hafi sterka stöðu með góðri dýravelferð, lágri sýklalyfjanotkun og litlum umhverfisáhrifum. „Í ljósi öryggis og fæðuframboðs eru öll rök fyrir aukinni framleiðslu til staðar,“ segir hann.

Skýrslan er einnig hugsuð sem hvatning til að sýna að landbúnaður er framtíðargrein með tækifæri. Borgström segir að LRF hafi „lausnamiðað sjónarhorn“ og vilji leggja fram tillögur sem styrki samkeppnishæfni og tryggi fæðuöryggi.

Sænskir bændur glíma við háan framleiðslukostnað og strangar reglur sem gera þeim erfitt fyrir í samkeppni við erlenda framleiðendur.

„Ef við ætlum að mæta aukinni eftirspurn, þarf aðgerðir til að bæta samkeppnishæfni og skapa hagkvæmara rekstrarumhverfi,“ segir Borgström. Hann vonast til að hluti tillagna LRF verði að veruleika á næstu árum.

Skýrslan bendir á að aukin framleiðsla í Svíþjóð myndi ekki aðeins styrkja fæðuöryggi heldur einnig stuðla að loftslagsmarkmiðum. „Landbúnaður og skógargeirinn eru hluti af lausninni á stærstu áskorunum samfélagsins,“ segir Borgström. „Þetta snýst um öryggi, matvælaframboð og loftslagsaðgerðir.“