Umhverfisviðurkenning veitt fyrir framúrskarandi störf

Fyrirtækin Humble og Krónan hlutu á dögunum Kuðunginn, umhverfisviðurkenningu umhverfis-, orku- og loftslagsráðuneytisins, fyrir framúrskarandi starf að umhverfismálum á síðasta ári.

Þá voru nemendur 10. bekkjar Brekkubæjarskóla á Akranesi útnefndir Varðliðar umhverfisins.

Humble hjálpar fyrirtækjum að umbreyta þeim vörum sem ekki seljast fullu verði í verslunum í söluvörur og þannig verðmæti í gegnum smáforrit sitt. Með þeirri leið er dregið úr sóun og nýting birgða bætt. Segir í úrskurði dómnefndar að Humble hafi með eftirtektarverðum hætti dregið úr matarsóun á Íslandi.

Í umsögn dómnefndar um Krónuna sagði að sá metnaður sé lofsverður sem hún hefði sýnt með stuðningi við nýjar og skapandi leiðir til þess að draga úr myndun úrgangs síðastliðinn áratug.

Nemendur í 10. bekk Brekkubæjarskóla á Akranesi fengu útnefningu sína fyrir verkefnið og viðburðinn Fræðslusmakk. Í verkefninu köfuðu nemendur ofan í fjölbreytt viðfangsefni loftslags- og umhverfismála, sem kynnt voru skólasamfélaginu, fjölskyldum og gestum og gangandi á sérstökum loftslagsviðburði í skólanum.