Tvær 100 ára konur í Fjarðabyggð
Jóna Árný Þórðardóttir, bæjarstjóri Fjarðabyggðar heimsótti nýlega tvær konur í sveitarfélaginu, sem eiga það sameiginlegt að hafa orðið 100 ára á árinu. Þetta eru þær Stefanía Sigurbjörnsdóttir á Eskifirði og Auður Bjarnadóttir frá Norðfirði.
Báðar eru þær hressar miðað við aldur og fyrri störf en þess má geta að Auður hefur búið alla sína ævi á Norðfirði á meðan Stefanía hefur búið á nokkrum stöðum en hún fæddist 22. febrúar 1926 í Stöð á Stöðvarfirði. Auður fæddist á Norðfirði 25. júní 1926.
„Það var einstaklega ánægjulegt að fá að heimsækja þessar tvær heiðurskonur, færa þeim blóm og eiga með þeim góða stund. Fyrir mig var sérstaklega dýrmætt að rifja upp gamla tíma með Auði úr sveitinni þegar ég var barn og heyra Stefaníu segja frá sinni löngu sögu á Eskifirði. Það var síðan sannarlega innblástur að vera nýbúin að ræða við þessa aldursforseta Fjarðabyggðar þegar við héldum upp á kvenréttindadaginn daginn eftir en heimsóknirnar fóru fram 18. júní,“ segir Jóna Árný Þórðardóttir, bæjarstjóri. Í dag búa 5.453 íbúar í Fjarðabyggð. Þriðji elsti íbúinn er 98 ára.
