Tjaldsvæðið í Breiðavík stækkar átjánfalt
Eigendur Hótels Breiðavíkur ætla að gera tímabundna aðstöðu fyrir tjaldgesti á túnum til þess að geta tekið á móti miklum fjölda ferðalanga sem von er á í tengslum við sólmyrkvann þann 12. ágúst.
Í Breiðavík er sú gistiaðstaða sem er næst Látrabjargi, en þar mun almyrkvinn á sólu vara lengst á föstu landi. Við hlið hótelsins í Breiðavík er tjaldsvæði sem er hálfur hektari að stærð, en dagana í kringum sólmyrkvann mun það stækka í níu hektara, sem er átjánföld stækkun.
Ekki er tekið á móti bókunum á tjaldsvæðinu, en rekstraraðilar hafa fulla trú á því að hafa pláss fyrir alla sem vilja tjalda. Þeir sem koma fyrst fá aðgang að rafmagni og sturtum á þeim hálfa hektara þar sem þegar hefur verið byggð upp aðstaða fyrir tjaldgesti. Þeir sem slá upp tjöldum utan þess svæðis hafa eingöngu aðgang að salernum. Nóttin á tjaldsvæðinu mun kosta 8.000 krónur fyrir hvern fullorðinn einstakling. Í fjölmiðlum hefur verið greint frá því að mikið hefur verið um afbókanir á hótelinu í Breiðavík og því hugsanlegt að enn finnist svefnstaður innandyra á svæðinu.
Ferðaþjónustuaðilarnir í Breiðavík hvetja fólk til þess að mæta 10. eða 11. ágúst og fara af svæðinu einum eða tveimur dögum eftir sólmyrkvann til þess að forðast umferðaröngþveiti. Búist er við miklum mannfjölda á Látrabjargi.
