Tíundi Bændamarkaðurinn hafinn
Bændamarkaður Krónunnar hófst föstudaginn 28. ágúst í öllum verslunum um land allt. Markaðurinn er nú haldinn í tíunda sinn en þar verður boðið upp á ferskt og ópakkað íslenskt grænmeti sem berst reglulega frá garðyrkjubændum í verslanir.
Á síðasta markaði seldust rúmlega 145 tonn, samanborið við 30 tonn þegar markaðurinn var fyrst haldinn árið 2012. Selt magn hefur því nær fimmfaldast frá fyrsta markaði. Tvær fyrstu helgar markaðarins nú hafa 50 tonn af fersku grænmeti selst í búðum Krónunnar.
Áætlað er að markaðurinn standi í fjórar helgar, en lengd hans og vöruúrval ræðst af uppskeru og framboði frá bændum. Alls taka 20 bændur þátt í ár og verður boðið upp á yfir 30 tegundir af nýuppteknu íslensku grænmeti. Grænmetið kemur víða að, meðal annars frá Flúðum, Reykholti, Laugarás, Vík, Hveravöllum og Varmalandi.
Rigningarsamt sumar hefur gert það að verkum að nokkur seinkun er á uppskeru á útiræktuðu grænmeti en útlit er fyrir góða og mikla uppskeru sem nær hámarki á næstu vikum. Gulrætur komu seinna inn í ár heldur en í fyrra sem var eitt besta útiræktarár í manna minnum. Endanlegt úrval getur því verið breytilegt milli helga.
Auk þekktra tegunda á borð við tómata, kartöflur, kál, rófur og papriku er von á rauðu grænkáli frá Umrót, garðyrkjustöð Sigrúnar á Flúðum. Grænkál er einstaklega hollt og hefur notið sívaxandi vinsælda og telst vera ofurfæða, bæði sem ferskvara og beint á grillið. Fleiri tegundir kunna að bætast við eftir því sem líður á uppskerutímann.
