Telja íslenska mjólk fara betur í maga
Rannsókn á vegum Háskóla Íslands hefur leitt í ljós að íslensk mjólk er ríkari af sérstakri gerð próteins en önnur mjólk og fari því betur í maga.
Íslenska mjólkin er ríkari af svokallaðri A2 gerð beta-casein prótíni. Rannsóknir á þessari gerð beta-caseins hefur fjölgað á síðustu árum. A2 mjólk þykir fara betur í maga en önnur mjólk og því hefur markaðssetning á þeirri tegund mjólkur aukist.
Samstarf milli fræða og framleiðenda
María Guðjónsdóttir, prófessor við Matvæla- og næringarfræðideild Háskóla Íslands, stýrir rannsókninni sem er jafnframt hluti af doktorsverkefni Didar Farid Kareem Al-Shateri í matvælafræði við sömu deild. Markmiðið með rannsókninni er að öðlast ítarlegri skilning á efnasamsetningu íslensku mjólkurinnar og lögð er áhersla á að rannsaka sérstaklega svokallaða A2 gerð beta-caseins.
„Fyrri rannsóknir benda til þess að mjólk úr hefðbundnum norrænum kúakynum, að því íslenska meðtöldu, innihaldi hærra hlutfall A2 beta-casein prótína en almennt gengur og gerist en neysla á mjólk sem er rík af þessum A2 beta-casein prótínum er talin tengjast ýmsum jákvæðum heilsufarslegum áhrifum,“ segir María. Jákvæð áhrif séu meðal annars stöðugri upptaka næringarefna úr mjólkinni, minni uppþemba og reglulegri hægðir.
Í doktorsnefndinni sitja Hildur Inga Sveinsdóttir, lektor við Matvæla- og næringarfræðideild og verkefnastjóri hjá Matís, auk Björns S. Gunnarssonar, vöruþróunar- og rannsóknarstjóra hjá MS. Rannsóknin er þannig samstarfsverkefni Matvæla- og næringarfræðideildar Háskóla Íslands, Mjólkursamsölunnar MS og Matís. Vonir standa til að samstarfið leiði til vöruþróunnar og framleiðslu á A2-ríkum mjólkurvörum.
Genasamsetning gæti stjórnað efnasamsetningu mjólkur
Ítarlegri þekking á efnasamsetningu mjólkurinnar veitir mikilvægar upplýsingar um hvort æskilegt sé að flytja inn nytjameiri kúakyn til að auka framleiðslu mjólkur og kjöts hér á landi. „Slíkur innflutningur getur þó haft áhrif á gæðaþætti mjólkurinnar og því ætti ekki að taka ákvarðanir um slíkan innflutning fyrr en allar niðurstöður liggja fyrir,“ segir María.
Þekkt sé að magn A2 beta-caseins í mjólk ræðst að hluta af genasamsetningu kúa, en hugsanlega geti fleiri ytri þættir haft áhrif á A2 beta-casein hlutfall mjólkurinnar.
