Tækifæri til orkuskipta í landbúnaði

– Fjárhagsleg sjálfbærni grunnforsenda fyrir sjálfbærum orkuskiptum

Vefþing var haldið á dögunum, þar sem sjónum var beint að stöðu og framtíð orkuskipta í landbúnaði.

Vefþingið var samstarfsverkefni Eims og Orkídeu og hluti af Evrópuverkefnunum RECET og Value4Farm. Í umfjöllun um þingið á vef Orkídeu kemur fram að sjónum hafi verið beint að stöðu og framtíð orkuskipta í einni af lykilgreinum íslensks samfélags og atvinnulífs, með það að markmiði að varpa ljósi á tækifæri til aukins orkusjálfstæðis í landbúnaði.

Framtíðarorkugjafi í sveitum

Fjallað var um fjölbreyttar tæknilausnir á þinginu – sem sumar eru farnar að sjást – og var sérstök áhersla lögð á rafmagns- og metanvæðingu landbúnaðartækja. Í því samhengi var reynslan af notkun metanknúinna dráttarvéla kynnt, ásamt því sem skoðað var hvernig innleiða megi rafvæðingu landbúnaðartækja búum landsins.

Til sérstakrar umfjöllunar var hvernig bændur geta sjálfir gerst framleiðendur að eigin orku úr lífrænum úrgangi þannig að allt metan verði nýtanlegt sem framtíðarorkugjafi í sveitum. 

Fjárhagsleg sjálfbærni grunnforsenda

Gestur Pétursson, forstjóri umhverfis- og orkustofnunar, ávarpaði þingið í Gestur Pétursson, forstjóri umhverfis- og orkustofnunar, ávarpaði þingið í upphafi. Hann sagði að gagnvart landbúnaðinum snúist verkefnið um orkuskipti í landbúnaði ekki einfaldlega um að skipta einum orkugjafa út fyrir annan. Sagði hann að til að orkuskipti geti talist raunverulega sjálfbær þurfi þau að eiga sér stað á þremur sviðum; umhverfislegu, samfélagslegu og fjárhagslegu.

Umhverfislega hliðin felist í því að draga úr eða eyða neikvæðum umhverfisáhrifum og lágmarka kolefnisfótspor greinarinnar. Samfélagslegur ávinningur ætti einnig að fylgja slíkum breytingum, þannig að ný störf skapist og aukin þekking verði til. Loks væri fjárhagsleg sjálfbærni grunnforsenda fyrir sjálfbærum orkuskiptum.

Metangas úr mykjunni

Andrew Parsons, fulltrúi breska tæknifyrirtækisins Bennamann, flutti erindið „Hættu að kaupa eldsneyti og byrjaðu að framleiða það“. Þar kynnti hann hvernig bændur geta breytt búfjáráburði og öðrum lífrænum úrgangi í hágæða metangas til að knýja dráttarvélar og flutningatæki.

Katie Hoare er breskur kúabóndi sem hefur hagnýtt metangasið úr mykjunni til að knýja vélarnar á sínu búi og hún sagði reynslusögu sína á þinginu. Þá flutti Sander Vandendriessche, sem starfar hjá belgísku rannsóknarmiðstöðinni Inagro, erindi um hagrænan og hagnýtan ávinning bænda í evrópska verkefninu Value4Farm, af því að knýja dráttarvélar með metani.

Að auki fluttu erindi þau Sigríður Ólafsdóttir, frá Ráðgjafarmiðstöð landbúnaðarins, Eiður Guðmundsson, frá Sorpu, og Steinþór Logi Arnarson, formaður Sambands ungra bænda.

Upptökur af þinginu eru aðgengilegar í gegnum vef Eims.