Sumarblóm í hengipottum – úr ýmsu að velja

- Blóm mánaðarins

Pottaplöntur heimilisins hafa vonandi komið vel undan vetri en þá er hægt að beina huganum að öðrum tegundum blóma. Biðin eftir vorinu getur verið strembin fyrir þá sem vilja prýða heimilisgarðinn með litríkum sumarblómum. Þau láta lítið yfir sér í fyrstu en ná að fanga athyglina þegar blómskrúðið kemur í ljós í sumarbyrjun. Mikill fjöldi tegunda er ræktaður í gróðrarstöðvum sem fara að bjóða þær til sölu nú þegar slakna fer á vetrar- og vorkuldanum. Gróðursett er í beð af öllu tagi, einnig í stærri og smærri blómaker.

Hengiblóm í garðinum

Skemmtileg leið til að prýða heimilisgarðinn er að hafa sumarblóm í hengipottum. Þeim má koma fyrir á ólíkum stöðum, td. á svalahandrið, veggi sólpalla, á grindur sólskála eða bara hvar sem er. Valdar eru tegundir sem eiga það sameiginlegt að vera gróskumiklar, blómríkar, vindþolnar og ekki sakar ef þær geta þolað nokkurn þurrk öðru hvoru. Allar eiga sameiginlegt að njóta sín best á sólríkum stað. Í garðplöntustöðvum er hægt að fá hengipottablóm sem góð reynsla er komin á hér á landi og þar er líka hægt að sjá nýjar tegundir í ræktun og aukið litaúrval í þeim eldri.

Ræktun hengiblómanna hefst síðla vetrar í gróðrarstöðvunum. Sumar tegundir eru ræktaðar af fræi, öðrum er fjölgað með græðlingum. Takast þarf á við ýmisleg atriði í uppeldinu. Sáning getur verið vandasöm, sömuleiðis þarf að taka græðlinga af móðurplöntum á réttu stigi eða notast við innflutta græðlinga þegar það á við. Ræktandinn þarf að hafa góða stjórn á hitastigi í gróðurhúsinu til að fá fram þéttar og blómmiklar plöntur á réttum tíma. Sömuleiðis getur þurft að halda aftur af lengdarvextinum með því að stytta greinar, jafnvel oftar en einu sinni. Plöntur í hengipottum eru yfirleitt ræktaðar í fremur stórum pottum, um 15 cm í þvermál. Vökvun er nákvæmnisatriði þar sem pottarnir hanga á vírum í gróðurhúsinu en ekki á venjulegum ræktunarborðum, nema fyrri hluta vaxtartímans. Flestir framleiðendur notast við sérstakt dropavökvunarkerfi til að stýra vökvuninni.

Umhirðan er einföld

Hengipottablómin eru notuð sem einærar plöntur því þær þola fæstar frost. Margar tegundir eru á markaðinum og það sem einkennir þær er hversu lengi þær blómstra og breiða úr sér, halda blómskrúði sínu jafnvel fram á haust. Sumar þeirra mætti færa inn í garðgróðurhús eða garðskála þegar haustar og lengja líftímann þannig. Til að halda blómskrúðinu sem mestu er ágætt ráð að fjarlægja þau blóm sem tekin eru að sölna, þannig fáum við lengri blómgunartíma. Fylgjast þarf vandlega með vökvun hengipotta því þeir eiga til að þorna hratt. Vökvað er með daufum blómaáburði fram eftir sumri. 

Fjöldi tegunda og yrkja fæst í gróðrarstöðvunum

Fallegar, sterkar og blómríkar tegundir eru til dæmis hengitóbakshorn (Petunia x hybrida ´surfinia´), betlehemsstjarna (Campanula isophylla), snædrífa (Sutera diffusa), sólboði (Osteospermum x hybridum), hengibegonía (Begonia boliviensis), blómahorn (Calibrachoa ´Million bells´), hengibrúðarauga (Lobelia erinus ´pendula´), skjaldflétta (Tropaeolum majus), borgardís (Diascia barbarae) og garðaslæða (Gypsophila muralis).

Engin leið er að lýsa blómfegurðinni með orðum. Best er að kynnast þessum fallegu blómum með því að heimsækja garðplöntustöðvarnar, dást að allri dýrðinni og fá þar faglegar upplýsingar um þarfir hverrar tegundar fyrir sig.

Höfundur er kennari við garðyrkjuskólann, Reykjum/FSu.