Sláturfélagið byggir nýtt stórgripasláturhús
Sláturfélag Suðurlands (SS) hefur ákveðið að byggja nýtt stórgripasláturhús við afurðastöðina á Selfossi.
Stærðin er um 1.200 m2 og kostnaður gróflega áætlaður um 900 milljónir króna. „Með nýju húsi bætist við gorklefi sem hefur vantað og gerir kleift að vinna vambir og garnir stórgripa og gera úr þeim verðmæti í stað þess að borga fyrir þessar afurðir til Orkugerðarinnar. Jafnframt verður mikil bæting á stórgriparéttinni með mörgum einstaklingsstíum, sem bæta líðan dýranna og vinnuaðstöðu starfsfólks og dýralækna. Einnig verður möguleiki á að slátra 5–600 kindum á dag og bjóða þannig ferskt dilkakjöt frá fyrri hluta ágúst og fram til jóla,“ segir Steinþór Skúlason, forstjóri SS, og bætir við: „Sparnaður og ávinningur með nýju húsi er um 300 milljónir króna yfir 25 ára tímabil og því má segja að kostnaður við fjárfestinguna sé um 600 milljónir króna.“
Vonast er til að framkvæmdir við nýja húsnæðið geti hafist í byrjun næsta árs og yrði þá lokið fyrir haustið 2028. Í dag starfa um 15 starfsmenn hjá SS á Selfossi en þeim mun fjölga upp í 130 þegar slátrun sauðfjár hefst í haust en reiknað er með að slátra um 100 þúsund fjár.
