Sátu fastir með timburfarm

Vegir sem liggja upp að býlum á Héraði bera sumir ekki flutning á timbri úr skógunum.

Grisjun skóganna á Héraði er mikilvæg fyrir framgang vaxtar í skóginum og vinnslu á efninu. Brú og vegir sem veita aðgengi að Vallanesi bera ekki timburflutninga.

Þungatakmarkanir eru bara plástur

Starfsmenn fyrirtækisins Tandrabretti þurftu að skilja tengivagn fullan af trjábolum eftir á vegi við félagsheimilið Iðavelli á leið sinni úr Vallanesi á Eskifjörð þar sem fyrirtækið er með viðarvinnslu. Vegurinn var því tímabundið lokaður.

Til að komast af veginum frá Vallanesi og út á nærliggjandi upp- héraðsveg 931 þarf að fara yfir gamla brú og hvort tveggja vegurinn og brúin bera ekki þá þungu flutninga sem skógrækt á svæðinu krefst.

Vandamálið er þekkt á fleiri bæjum á Héraði, gjarnan á vegum sem tveir til þrír bæir deila. Í Vallanesi er stór skógur sem nytjar eru af og slíkir flutningar reglulegir. Ótækt er að þeir geti bara átt sér stað þegar frost er í jörðu eða skraufþurrt.

„Ég hef skrifað Vegagerðinni á hverju ári en fæ engin svör önnur en um fjármagnsskort og að annað gangi fyrir. Á meðan drabbast vegirnir niður,“ segir Eymundur Magnússon, bóndi í Vallanesi, um veginn sem er svokallaður héraðsvegur. „Vegagerðin hefur stundum sett þungatakmarkanir á þessa vegi en það er bara plástur, en ekki lækning, en það var ekki svo núna.“ Hann segir líka ótækt að efni komist ekki til vinnslu, ekki gangi að hún sé efnislaus.

Áhrif á ferðaþjónustuna

„Vegurinn er með versta móti núna, þetta er drullusvað frá vegamótunum og út að Iðavöllum, burðarlagið er einfaldlega farið,“ segir Eymundur um núverandi stöðu. „Þetta er bagalegt hér hjá okkur í Vallanesi, við erum að fá kvartanir í bókunarkerfinu um að vegurinn upp að bænum sé ónýtur, fólk er að spyrja sig hvort það sé á réttri leið. Við fáum um 10.000 gesti á ári þótt við séum vel falið leyndarmál.“

Eymundur veit af fleiri bændum á Austurlandi sem standa frammi fyrir sama vanda, til dæmis á Útnyrðingsstöðum og úti á Héraði.

„Ég hef ákveðið að sjá tækifæri í þessu og planta bara salati í veginn, þetta er flottur jarðvegur,“ segir Eymundur að lokum og glottir í kampinn.