Sækja um leyfi til skógræktar á 415,4 ha svæði

Ragnheiður Aradóttir og Kári Steinar Karlsson á jörðinni Galtalæk í Rangárþingi ytra hafa sótt um framkvæmdaleyfi hjá sveitarfélaginu til skógræktar á um 415,4 hektara svæði úr landi sínu.

Áður hefur verið veitt leyfi fyrir alls 345,4 hektara skógrækt. Skipulags- og umferðarnefnd Rangárþings ytra gerir ekki athugasemdir við veitingu framkvæmdaleyfis vegna nýja svæðisins þegar tilskilin gögn hafa borist, en áður en það gerist verði umsækjendur að leggja fram matsfyrirspurn til Skipulagsstofnunar, sem metur hvort umrædd framkvæmd skuli háð mati á umhverfisáhrifum, þar sem stærð svæðisins er yfir 200 ha.

Nefndin leggur einnig til að gerð verði breyting á landnotkun svæðisins í aðalskipulagi sveitarfélagsins þar sem núverandi óbyggt svæði verði gert að skógræktar- og landgræðslusvæði og skuli sú breyting kostuð af umsækjendum.