Reynir að kaupa bara íslenskt kjöt og sneiðir hjá erlendu grænmeti
„Aukinn innflutningur matvæla mun flýta fyrir því að nær alónæmar bakteríur nái hér fótfestu. Það eru engin ný sýklalyf á markaði þannig að hvert ár sem við getum tafið þessa þróun skiptir okkur máli,“ sagði Karl G. Kristinsson, prófessor í sýklafræði við HÍ, í fyrirlestri sem hann hélt um sýklalyfjaónæmi á dögunum á ráðstefnu um rannsóknir í líf- og heilbrigðisvísindum. Í erindi sínu fjallaði hann um fæðu- og matvælaöryggi Íslendinga og áhrif framleiðsluþátta og uppruna matvæla á bakteríur.
Húsfyllir var á opnum fyrirlestri á ráðstefnu um rannsóknir í líf- og heilbrigðisvísindum, sem haldin var í Háskóla Íslands föstudaginn 4. janúar.
Fréttaflutningur af fyrirlestri Karls var töluverður yfir helgina en Ríkissjónvarpið hafði það eftir prófessornum að hann sneiddi hjá innfluttu grænmeti og reyndi eftir megni að kaupa bara íslenskt kjöt. Karl sagði að Ísland hefði algjöra sérstöðu vegna lítillar notkunar á sýklalyfjum í landbúnaði og lágs hlutfalls sýklalyfjaónæmis sem væri ein mesta ógn við lýðheilsu heimsins í dag.
Karl telur æskilegt að Ísland verði sjálfbært í framleiðslu á kjöti og því grænmeti sem við getum ræktað. Hann vill vekja almenning til umhugsunar um áhættuna og hvort og hvernig eigi að varðveita þá sérstöðu sem Ísland hefur í dag.
Upptaka af erindi Karls er aðgengileg hér undir (smellið á myndina og þá hefst fyrirlesturinn á mín. 31.15.
Karl sýndi m.a. þessa mynd í fyrirlestri sínum sem staðfestir góða stöðu Íslands þegar kemur að sýklalyfjaónæmi í kjúklingum. Græni liturinn merkir að ekki sé ónæmi fyrir neinu sýklalyfi. Neðst á myndinni eru lönd þar sem staðan er ekki góð og kjúklingar ónæmir fyrir allt að níu sýklalyfjategundum.
