Lóðrétt jarðarberjaræktun á sex hæðum í húsnæðinu
Hjá Örnu mjólkurvinnslu í Bolungarvík, sem sérhæfir sig í framleiðslu á mjólkurvörum án laktósa, hefur á undanförnum mánuðum verið í undirbúningi að hefja inniræktun eigin jarðarberja fyrir framleiðsluna í húsakynnum fyrirtækisins. Stefnan er einnig sett á kryddjurtaræktun til ostagerðarinnar fljótlega á næsta ári.
Að sögn Hálfdáns Óskarssonar, framkvæmdastjóra Örnu, er verkefnið komið á framkvæmdastig og var fyrstu fræjunum sáð núna í júlí. „Eftir fjóra mánuði munum við síðan hefja ræktun á jarðarberjum,“ segir hann.
Tuttugu tonna jarðarberjauppskera á ári
Hálfdán segir að ræktunin fari fram í húsnæði Örnu að Hafnargötu 80 í Bolungarvík, en Arna festi nýlega kaup á öllu húsnæðinu sem eru rúmlega 7.000 fermetrar að stærð. „Í sjálfu sér þurfum við ekki svo afskaplega stórt húsnæði fyrir þetta, þar sem við munum nýta okkur svokallað lóðrétta ræktun. Grunnflöturinn er um 350 fermetrar og við munum rækta á sex hæðum. Þannig náum við um 2.000 fermetra ræktunarfleti sem ætti að skila okkur 20 tonnum af jarðarberjum á ári. Ræktað er í lokuðu rými í vatni undir Led-ljósum og stjórnum við því öllum umhverfisþáttum sjálf og erum algjörlega óháð öllum utanaðkomandi þáttum.
Sömu aðferð munum við einnig nota við ræktun á kryddjurtum sem við stefnum á að framleiða og nota í ostana okkar fljótlega á næsta ári.“
Hráefni úr nærumhverfinu
Hálfdán segir að þessi framleiðsla sé fyrst og fremst hugsuð sem viðbót í byrjun, en þegar fram líður og framleiðslan eykst sé stefnan sett á að skipta út erlendum bragðefnum.
„Þessi ræktunaraðferð hefur notið vaxandi vinsælda þar sem mun betri nýting næst á ræktunarrýminu sem og að auðveldara er að hafa stjórn á öllum þeim þáttum sem hafa áhrif á ræktunina.
Við höfum á undanförnum árum verið að nýta hráefni héðan úr nærumhverfinu í okkar vörur. Á sumrin framleiðum við Sumarjógúrt með rabarbara sem við söfnum hér á svæðinu og á haustin kemur hið sívinsæla Haustjógúrt á markað, en þar nýtum við einmitt aðalbláber héðan úr fjöllunum sem fólk tínir fyrir okkur.
Framleiðsla á jarðarberjum og kryddi er því enn einn þáttur í því, að þau hráefni sem við notum í okkar framleiðslu sé annars vegar ræktuð hér fyrir vestan eða að þeirra sé aflað hér úr nærumhverfinu,“ segir Hálfdán.
