Kuldi næstu daga
Varað er við snjókomu og því að bændur fyrir austan komi fé í skjól.
„Við vörum við því og viljum vekja athygli á því að það sé að fara að snjóa á þessum árstíma og bændur hugi að því að geta komið fé í skjól“, segir Teitur Arason veðurfræðingur Veðurstofu Íslands. „Þetta er snjókoma á óvenjulegum tíma, það verður send út gul viðvörun vegna snjókomu á Austfjörðum og Austurlandi að Glettingi og yfir á Norðurland eystra og miðhálendið. Hún mun gilda mislengi eftir svæðum“, segir Teitur.
„Snælínan, frostmarkslínan fer aðeins upp og niður, þannig að það verður að gera ráð fyrir að hún sé frá því að vera nærri sjávarmáli og upp í kannski 200 metra.“
Hitamet hafa fallið á Bretlandi að undanförnu og heitt loft streymir norður eftir Atlantshafinu og mætir köldum loftmassa úr norðri. „Áreksturinn á sér stað yfir landinu og myndar þessa úrkomu“, segir Teitur sem segir kuldann vara í nokkra daga og gefa eftir þegar kemur fram á helgina. „Þetta verður orðið skárra á sunnudaginn, þá er minna hvítt í úrkomunni.“
„Ef þetta væri venjulegt norðanhret þá myndi seint að kvöldi vera kalt á öllu landinu. Vorhret er svo sem algengt en það var býsna hart 2024 og olli fugladauða. Það má segja að þetta sé ekki nærri eins hart núna.“
