Kirkjubæjarklaustur II
Sverrir og Fanney Ólöf tóku við búi 2003 af foreldrum Fanneyjar, þeim Lárusi Valdimarssyni og Sólrúnu Ólafsdóttur. En þau byggðu þetta nýbýli út úr Klaustursjörðinni.
Búskapurinn hefur verið með svipuðu sniði síðan við byrjuðum, þ.e. fjárbú og nokkur hross. Fanney er búfræðikandídat og starfar með búinu sem ráðunautur hjá RML í hlutastarfi.
Býli: Kirkjubæjarklaustur II.
Staðsett í sveit: Skaftárhreppi í Vestur-Skaftafellssýslu.
Ábúendur: Sverrir Gíslason og Fanney Ólöf Lárusdóttir.
Fjölskyldustærð (og gæludýra):
Við eigum þrjú börn. Sólrún Lára, rétt að verða 14 ára, Sigurður Gísli, sem verður 10 ára í júlí og Ásgeir Örn, 8 ára. Eigum eina tík, Tátu, sem er nú hálfgert gæludýr.
Stærð jarðar? Alls 2.000 ha, sameign með Kirkjubæ II.
Gerð bús? Sauðfjárbú og nokkur hross.
Fjöldi búfjár og tegundir? Um 520 ær og hrútar og 8 hross.
Hvernig gengur hefðbundinn vinnudagur fyrir sig á bænum?
Fer að sjálfsögðu eftir árstíð. Þessa dagana er sólarhringsvakt í fjárhúsunum sem við hjónin skiptum á okkur.
Skemmtilegustu/leiðinlegustu bústörfin? Það eru nú flest störf skemmtileg í sambandi við búskapinn. Sauðburður, heyskapur og smalamennskur standa upp úr. Ætli skítmoksturinn sé ekki leiðinlegastur.
Hvernig sjáið þið búskapinn fyrir ykkur á jörðinni eftir fimm ár? Á svipuðum nótum og í dag.
Hvaða skoðun hafið þið á félagsmálum bænda? Félagsmálin teljum við í góðum höndum.
Hvernig mun íslenskum landbúnaði vegna í framtíðinni? Við teljum að honum muni vegna vel. Mikill áhugi er hjá ungu fólki að koma inn í greinina og lofar það góðu um framhaldið.
Hvar teljið þið að helstu tækifærin séu í útflutningi íslenskra búvara? Mest tækifæri í útflutningi á lambakjöti sem selt yrði sem hágæðavara. Einnig góð tækifæri í útflutningi mjólkurvara.
Hvað er alltaf til í ísskápnum? Nýmjólk, léttmjólk, undanrenna, ostur, sulta, hangikjötsálegg, tómatsósa og hvítlauksostur. Stundum rjómi.
Hver er vinsælasti maturinn á heimilinu? Hinir ýmsu réttir matreiddir úr lamba- eða ærkjöti.
Eftirminnilegasta atvikið við bústörfin? Þegar gaus í Grímsvötnum vorið 2011 á sauðburði. Þá birti ekki að degi vegna öskufalls að morgni 22. maí.
.jpg)
