Kærir meðferð Skipulagsstofnunar á umsókn Arctic Sea Farm fyrir laxeldi
Höfundur: Hörður Kristjánsson
Landssamband veiðifélaga mun nú í vikunni leggja fram kæru til úrskurðarnefndar umhverfis- og auðlindamála vegna meðferðar Skipulagsstofnunar á umsókn Arctic Sea Farm hf. um rekstrarleyfi fyrir 8.000 tonna laxeldi í Ísafjarðardjúpi.
LV mun kæra ákvörðun Skipulagsstofnunar um að meðferð og afgreiðsla umsóknar Arctic Sea Farm hf. um rekstrarleyfi fyrir sjókvíaeldi í Ísafjarðardjúpi fari eftir eldri ákvæðum laga nr. 71/2008 um fiskeldi, sbr. ákvæði II til bráðabirgða. LV krefst þess að hin kærða ákvörðun verði felld úr gildi og að lagt verði fyrir Skipulagsstofnun að afgreiða umsókn Arctic Sea Farm hf. samkvæmt núgildandi lögum nr. 71/2008 um fiskeldi.
Telur að frummatskýrslu hafi verið skilað of seint
LV telur að frummatsskýrslu Arctic Sea Farm hf. hafi verið skilað eftir gildistöku bráðabirgðaákvæðis II við fiskeldislög. Það hefur þá þýðingu að málsmeðferð samkvæmt fiskeldislögum á að fara eftir nýjum ákvæðum laganna. Meðal annars var sett inn nýtt ákvæði í lögin sem fjallar um skiptingu hafsvæða í eldissvæði, auglýsingu og úthlutun þeirra. Ráðherra úthlutar nú eldissvæðum þegar burðarþol, áhættumat erfðablöndunar og svæðaskipting skv. 1. mgr. liggur fyrir. Hvorki áhættumat erfðablöndunar né svæðaskipting liggur fyrir.
Þá telur LV ljóst að Skipulagsstofnun hefði með réttu átt að hafna því að taka hana til athugunar þar sem skýrslan er í verulegu ósamræmi við lög um mat á umhverfisáhrifum. Að mati LV var í frummatsskýrslu vikið með svo afgerandi hætti frá efni matsskýrslu varðandi umfang og framkvæmdasvæði að Skipulagsstofnun bar að hafna skýrslunni óbreyttri.
Í frummatsskýrslunni er gert ráð fyrir að umfang starfseminnar verði talsvert meiri en gert hafði verið ráð fyrir í matsáætlun. Í skýrslunni er þá gert ráð fyrir að tekið verði upp nýtt eldissvæði við Vigur í Ísafjarðardjúpi en það var ekki tilgreint í matsáætlun. Að mati LV eiga þessir alvarlegu annmarkar á frummatsskýrslunni að leiða til ógildingar ákvörðunar Skipulagsstofnunar.
Skipulagsstofnun er nú með í vinnslu frummatsskýrslu um 10.000 tonna laxeldi Arnarlax ehf. í Ísafjarðardjúpi. Að mati LV eru líka alvarlegir annmarkar á þeirri skýrslu. LV mun gera athugasemdir við skýrsluna og eftir atvikum kæra ákvörðun Skipulagsstofnunar til úrskurðarnefndar um umhverfis- og auðlindamál.
Mun gera allt til að koma í veg fyrir laxeldi í Djúpinu
LV segist gera allt sem í valdi þess stendur til þess að koma í veg fyrir fyrirætlanir um laxeldi í Ísafjarðardjúpi enda muni það hafa hörmulegar afleiðingar í för með sér fyrir náttúruna, ekki síst hina einstöku villtu laxastofna sem eiga heimkynni þar.
