Jón Gnarr og Pétur Jóhann Sigfússon taka tal saman í Kaupfélaginu

Fyrsta launaða sumarvinna leikarans Péturs Jóhanns Sigfússonar var sem léttapiltur á Hótel Sögu í Vesturbæ Reykjavíkur. Áður hafði hann verið sendur í sveit þar sem móðir hans vildi ekki að hann mældi göturnar í borginni eins og hún orðaði það. Vinnuna í Bændahöllinni fékk Pétur Jóhann í gegnum sambönd en æskuvinur hans var Garðbæingurinn Guðmundur Steingrímsson.

„Steingrímur Hermannsson, pabbi hans, blessuð sé minning hans, hann reddaði þessari vinnu fyrir okkur báða. Hérna vorum við að pikkalóast eins og það var kallað. Þvílíkt ævintýri og nánast eins og að vera á skemmtiferðaskipi því þetta var algjör ævintýraheimur,“ segir Pétur Jóhann sem starfar nú sem móralskur leiðbeinandi hjá veitingafyrirtækinu Gleðipinnum, starf sem hann þróaði sjálfur í samvinnu við eigendur fyrirtækisins.

Þetta kemur fram í hlaðvarpsþættinum Kaupfélagið þar sem kaupfélagsstjórinn Jón Gnarr spjallar við Pétur Jóhann um heima og geima. Þeir ræða um sveitastörf að fornu og nýju, fyrirgreiðslupólitík af gamla skólanum, fyrrgreind pikkalóstörf Péturs Jóhanns á Hótel Sögu og um svæsin mígreniköst Jóns sem hafa dregið dilk á eftir sér.

Að sjálfsögðu sitja þeir í hljóðstofu með Bændablaðið fyrir framan sig sem kveikir ótal hugmyndir og hugrenningatengsl hjá þessum gömlu vinum.

Hægt er að hlusta á hlaðvarpsþætti Hlöðunnar hér á bbl.is en einnig á öllum helstu hlaðvarpsveitum.