Íslensk prjónahátíð á Norðurbryggju í Kaupmannahöfn

Íslenskri prjónahátíð verður haldin 7. og 8. september í Norðurbryggju í Kaupmannahöfn, sem er menningarhús Íslands, Færeyja og Grænlands á Kristjánshöfn.

Prjónahátíðin nefnist Pakhusstrik og að sögn Höllu Benediktsdóttur, umsjónarmanns Jónshúss og verkefnisstjóra hátíðarinnar, verða íslenskir garnframleiðendur á staðnum ásamt íslenskum prjónahönnuðum og ætla þeir meðal annars að segja frá vörum sínum og vonandi selja dönskum handprjónafólki afurðir sínar.

Íslenskar ullarvörur henta vel danskri veðráttu

„Í Danmörku er mikill áhugi á Íslandi og íslenskri menningu. Íslensk prjónahefð og íslenskar prjónauppskriftir njóta vinsælda. Sala á íslensku handprjónabandi hefur aukist mikið síðastliðin ár enda henta íslenskar ullarvörur vel danskri veðráttu.

Það sem gerir þennan viðburð einstakan er að þar er hægt að kaupa garn, uppskriftir og annað sem tilheyrir handprjóni. Umfram það er boðið upp á  fyrirlesta, námskeið, tískusýningu – og í fyrsta sinn verður keppt í hraðprjónakeppi,“ segir Halla, en miðaverði er stillt í hóf og með hverjum keyptum miða fylgir gjöf frá Ístex.

Sérstök áhersla á lopapeysuna

Halla segir að til að fagna fullveldisafmælisárinu verði lögð sérstök áhersla á lopapeysuna.  „Til að gera henni góð skil verður haldin sýning um hana í anddyri Sendiráðs Íslands – sem er í sama húsi – undir yfirskriftinni Íslenska lopapeysan - uppruni, saga og hönnun.  Sýningin opnar föstudaginn 7. september og verður út árið. Auk þess flytur Ásdís Jóelsdóttir, lektor í Háskóla Íslands, fyrirlestur um uppruna lopapeysunnar og Auður Björt Skúladóttir flytur fyrirlestur um hvernig lopapeysa er prjónuð,“ segir Halla.

Þetta er fimmta árið í röð sem prjónahátíðin er haldin. Fjöldi þátttakenda hefur vaxið með hverju ári og segir Halla að í það stefni að uppselt verði í ár á hátíðina.