Íslensk hönnun í Mýrdal

EY Collection er íslenskt lista- og hönnunarfyrirtæki staðsett í Garðakoti í Vík í Mýrdal.

Vinkonurnar Eva Dögg Þorsteinsdóttir og Þorbjörg Kristjánsdóttir hafa alla tíð verið hrifnar af handverki og listum. Í dag reka þær vinnustofuna og verslunina EY Collection, hanna vörurnar og búa þær margar hverjar til. EY leggur áherslu á vörur sem hafa tengingu við náttúru, menningu og sögu nærumhverfisins. Þar má finna margvíslegar nytja- og gjafavörur, líkt og bolla, taupoka, kerti, teppi, skrautmuni og tækifæriskort.

Vörurnar eru hannaðar í Mýrdal og sækja Eva og Þorbjörg sér mikinn innblástur í náttúruna þar í kring. Vörur þeirra eru gjarnan skreyttar íslenskum fuglum og plöntum. Bæði fá þessi klassísku blóm að njóta sín, líkt og gleymmérei, baldursbrá og hvönnin en þá fá plöntur sem enda oftast ekki í íslenskri hönnun einnig að stíga fram í sviðsljósið eins og melgresið og puntstráin. Einkennandi landslag Mýrdals, svörtu sandar Reynisfjörunnar og dramatísku drangarnir hafa einnig veitt þeim innblástur.

Vinkonurnar nota efnivið úr umhverfinu, tína jurtir sem þær nýta í kertaskreytingar og nota ull af kindunum sínum til þess að búa til gærur og fjölbreyttar ullarvörur. Eva málar myndirnar sem þær nota á meðan að Þorbjörg saumar en þær hanna allar vörurnar í sameiningu. Íslandslínan þeirra hefur verið einkar vinsæl en þar má sjá málaða mynd af fjölskyldu í íslenska þjóðbúningnum. Auk eftirprents af málverkinu sjálfu hafa þær prentað myndina á servíettur, kerti og eldspýtustokka. Saumuð ullardýr sem þær búa til úr efnis- og ullarafgöngum hafa auk þess notið vinsælda.

Litríkir og brosmildir steinar hafa vakið mikla lukku meðal viðskiptavina EY Collection. Happy Stone, á íslensku Glaður steinn, er hönnun sem Eva og Þorbjörg hugsuðu að myndi höfða sérstaklega til barna en hefur verið vinsæl meðal allra aldurshópa. Happy Stone eru þæfðar kúlur sem vísa í ávala fjörusteina, með augu og stærðarinnar bros. Aðallega hefur selst af lyklakippum en á döfinni er að gera derhúfur með þessum vinsælu krúttlegu fígúrum.

Aðspurðar um aðrar nýjungar segir Þorbjörg að þæfðar ullarsápur séu nú á leið í verslunina en annars séu hugmyndirnar endalausar svo það sé um að gera að fylgjast vel með EY Collection. Sem stendur eru Eva og Þorbjörg að undirbúa sumarmánuðina en mikið af ferðafólki leggur leið sína á Suðurlandsundirlendið. Þetta er þriðja sumarið sem þær stöllur hafa opið fast og hlakka þær til að taka á móti fjölbreyttum gestum. Þeir sem gera sér ferð út að Dyrhólaey geta komið við í Garðakoti, litið hönnunina augum og jafnvel verður heitt á könnunni.