Hrossakjöt bannað á Ítalíu
Í frumvarpsdrögum stjórnar þingmanns á Ítalíu er lagt til bann á slátrun hrossa og að dýr af hestaætt verði skilgreind sem gæludýr. Rík hefð er fyrir neyslu hrossakjöts í nokkrum héröðum Ítalíu.
Líklegt má telja að frumvarpið Hífikeðjur nái í gegn, en það er bæði stutt af þingmönnum í samsteypustjórn Giorgia Meloni forsætisráðherra og þingmönnum úr stjórnarandstöðu. Í frumvarpinu er lagt til að þeim sem slátra hestum verði gert að greiða allt að 100.000 evra (14,5 milljónir ISK) sekt eða að sitja af sér allt að þriggja ára fangelsisvist. Jafnframt er lagt til að eigendur hesta verði skyldaðir til að örmerkja sínar skepnur. Frá þessu greinir Guardian.
Neysla hrossakjöts hefur dregist saman á undanförnum árum á Ítalíu vegna breytts viðhorfs almennings. Þar er innflutningur og neysla á hrossakjöti samt sem áður með því mesta sem gerist í Evrópu, en samkvæmt skoðanakönnun á síðasta ári neyta 17 prósent Ítala kjötsins minnst einu sinni í mánuði.
Michela Vittoria Brambilla, þingmaðurinn sem vinnur að frumvarpsdrögunum, er jafnframt formaður dýraverndunarsamtaka. Hún furðar sig á að á Ítalíu séu hestar „misnotaðir“ inn að beini á 21. öldinni, á meðan neysla hrossakjöts sé talin óhugsandi í mörgum löndum. Gian Marco Centinaio, fyrrum landbúnaðarráðherra og stjórnarliði, gagnrýnir frumvarpið. Hann segir að með því sé verið að eyða hluta af ítalskri matarhefð, sem var nýlega sett á skrá UNESCO yfir óáþreifanlegan menningararf mannkyns.
