Hrafnhildur Inga er sveitalistamaður
Á fjölmennri kjötsúpuhátíð á Hvolsvelli síðustu helgina í ágúst var boðið upp á fjölbreytta dagskrá. Einn af dagskrárliðunum á laugardeginum var fjölskylduhátíð þar sem ýmis verðlaun voru veitt á vegum Rangárþings eystra.
Hrafnhildur Inga Sigurðardóttir á Sámsstaðabakka í Fljótshlíð var til dæmis útnefnd Sveitalistamaður Rangárþings eystra en hún er Fljóthlíðingur, fædd og uppalin á Vestri-Sámsstöðum. Með útnefningunni er Hrafnhildi Ingu þakkað fyrir hennar framlag til lista og menningar en hún hefur meðal annars gert náttúru og landslagi heimahaganna skil í verkum sínum þar sem landslag, birta og veður skipa stóran sess.
Fjölmargar aðrar viðurkenningar voru veittar á hátíðinni. Hans Þór Hilmarsson var til dæmis kjörinn íþróttamaður ársins 2026 en hann náði góðum árangri á stærstu mótum ársins í hestamennskunni. Gistiheimilið Fagrahlíð í Fljótshlíð var valið snyrtilegasta fyrirtæki sveitarfélagsins en nýlega tóku nýir aðilar við rekstri heimilisins, en það eru þau Hlynur Snær Theodórsson og Guðlaug Jónsdóttir, og Uppsalir í Fljótshlíð var valið snyrtilegasta býlið en þar er mikill metnaður lagður í það að halda umhverfi svæðisins snyrtilegu og fínu, auk þess sem öflug skógrækt er stunduð á bænum. Snyrtilegasti garður sveitarfélagsins er við Króktún 11 á Hvolsvelli hjá Önnu Kristínu Helgadóttur og fjölskyldu. Þá fékk Ólafur Elí Magnússon, íþróttakennari á Hvolsvelli, samfélagsverðlaun Rangárþings eystra en hann hefur um áratugaskeið lagt ómetanlegt starf af mörkum fyrir samfélagið, ekki síst í þágu barna, ungmenna og íþróttastarfs. Loks má geta þess að systurnar frá Mið-Mörk undir Eyjafjöllum voru sérstaklega heiðraðar, en þær hafa verið að gera það gott á alls konar kraftamótum eins og á Special Olympics.
