Hólabær og Gunnsteinsstaðir
Rúnar Aðalbjörn Pétursson og Auður Ingimundardóttir keyptu Hólabæ og Gunnsteinsstaði um síðustu áramót af foreldrum Rúnars, Pétri Péturssyni og Þorbjörgu Bjarnadóttur.
Rúnar er fimmti ættliðurinn sem býr á jörðunum.
Býli: Hólabær og Gunnsteinsstaðir.
Staðsett í sveit: Langadal í Austur-Húnavatnssýslu.
Ábúendur: Auður Ingimundardóttir og Rúnar Aðalbjörn Pétursson.
Fjölskyldustærð (og gæludýra): Við eigum soninn Pétur Inga sem er 1 árs. Á bænum eru hundarnir Skotta og Týra ásamt köttunum Snældu og Sinnep.
Stærð jarðar? Heildarstærð jarðarinnar er um 2.300 hektarar.
Gerð bús? Blandað bú, kýr og kindur.
Fjöldi búfjár og tegundir? 70 nautgripir, þar af 24 mjólkurkýr, og 360 vetrarfóðraðar ær.
Hvernig gengur hefðbundinn vinnudagur fyrir sig á bænum? Allir vinnudagar byrja og enda í fjósinu. Þess á milli er gefið í fjárhúsum og gengið í önnur verk sem falla til, misjöfn eftir árstímum.
Skemmtilegustu/leiðinlegustu bústörfin? Flest bústörfin eru skemmtileg en þó eru smalamennskur og fjárrag í sérstöku uppáhaldi. Leiðinlegast er þegar vélar og tæki bila eða skepnur veikjast.
Hvernig sjáið þið búskapinn fyrir ykkur á jörðinni eftir fimm ár? Með svipuðu sniði en vonandi með bættri aðstöðu í mjólkurframleiðslunni og auknum afurðum.
Hvaða skoðun hafið þið á félagsmálum bænda? Við höfum áhyggjur af minnkandi þátttöku bænda í félagsmálum en erum þakklát því fólki sem er tilbúið að verja tíma sínum í að berjast fyrir hagsmunum bænda.
Hvernig mun íslenskum landbúnaði vegna í framtíðinni? Við erum bjartsýn fyrir hönd íslensks landbúnaðar.
En til þess að honum vegni vel er nauðsynlegt að bændur þjappi sér saman og vinni að hagsmunum okkar sem ein heild.
Hvar teljið þið að helstu tækifærin séu í útflutningi íslenskra búvara? Þar er hreinleikinn númer eitt, tvö og þrjú. Við eigum að markaðssetja íslenskar afurðir sem gæðavöru, gæði umfram magn.
Hvað er alltaf til í ísskápnum? Mjólk, ostur, kæfa og pítusósa.
Hver er vinsælasti maturinn á heimilinu? Lambalæri með sveppasósu og brúnuðum kartöflum.
Eftirminnilegasta atvikið við bústörfin? Við höfum nú ekki verið bændur lengi og því er líklega eftirminnilegast þegar við tókum við búrekstrinum um síðustu áramót.
