Göngustígur hefur slegið í gegn
Fræðslustígur við Þorvaldseyri undir Eyjafjöllum nýtur vinsælda en hann var hannaður af Basalt arkitektum fyrir styrk úr Framkvæmdasjóði ferðamannastaða.
Í framhaldi af eldgosinu í Eyjafjallajökli 2010 opnaði fjölskyldan á Þorvaldseyri undir Eyjafjöllum vinsæla gestastofu í verkstæðishúsi sunnan þjóðvegarins vorið 2011. Fljótlega fór að bera á því að ferðamenn stoppuðu við heimreiðina að Þorvaldseyri og við gestastofuna, löbbuðu á þjóðveginum til að ná myndum af sér með jökulinn í baksýn, og af þessu var mikil slysahætta. Katla jarðvangur tók að sér rekstur gestastofunnar 2019 en á undanförnum árum hefur verið rekið þar kaffihús og bakarí. Þegar þessi mikli áhugi ferðamanna kom í ljós var ákveðið af stjórn Kötlujarðvangsins að sækja um styrk hjá Framkvæmdasjóði ferðamannastaða til þess að búa til fræðslustíg.
16 fræðsluskilti
„Útfærsla verkefnisins var svo unnin í þéttu samstarfi jarðvangsins, landeiganda og sveitarfélagsins en þegar kom að framkvæmdum varð það að ráði hjá Jóhannesi M. Jóhannessyni, núverandi forstöðumanni jarðvangsins, í samvinnu við Ólaf Eggertsson á Þorvaldseyri, að leita að bergsýnishornum í nágrenninu og koma þeim fyrir við hliðina á hverju fræðsluskilti. Fræðsluskiltin eru 16, auk eins almenns skiltis og er þeim komið fyrir við hvern og einn bókstaf orðsins Eyjafjallajökull, en stafirnir eru mótaðir í stíginn með mismunandi lit á hellusteinunum. Textinn er gagnorður, bæði á ensku og íslensku, og lýsir ólíkum stigum í ferli gossins 2010. QR kóði er á hverju skilti, sem leiðir lesendur á ítarlegri umfjöllun um efnið,“ segir Sigurður Sigursveinsson, sem á sæti í stjórn Kötlujarðvangsins.
Gjaldfrjálst bílastæði við stíginn
Sigurður segir ferðamenn mjög ánægða með stíginn. „Já, og stígurinn er í þjóðbraut en í öruggu umhverfi og öllum aðgengilegur. Það spillir ekki að stórt og gjaldfrjálst bílastæði er við enda stígsins en mjög gott samstarf hefur verið við Vegagerðina um þetta fyrirkomulag. Rúsínan í pylsuendanum er svo þetta frábæra bakarí og kaffihús sem er í húsinu á staðnum,“ segir Sigurður.
Verðlaun fyrir gott framtak
Þá má geta þess að stígurinn fékk fyrr í vetur umhverfisverðlaun Ferðamálaráðs og það má því ljóst vera að um ákaflega vel heppnað framtak er að ræða en í umsögn Ferðamálaráðs kom fram að hann væri einkar gott dæmi um vel heppnað samstarf sveitarfélags, landeiganda og sérfræðinga. „Sveitarfélögin þrjú, Rangárþing eystra, Mýrdalshreppur og Skaftárhreppur, sem standa að jarðvanginum, eru fámenn og því eru sérfræðistörf, sem fylgja stofnun eins og jarðvanginum, einkar mikilvæg byggðinni. Jarðvangurinn er þannig farvegur til að sameina krafta staðarþekkingar og sérfræðiþekkingar,“ segir Sigurður enn fremur.
