Gjald fyrir að góma fé
Umhverfis- og skipulagsráð Vestmannaeyjabæjar ræddi lausagöngu búfjár á fundi sínum í byrjun mánaðar.
Annars vegar var samþykkt gjaldskrá fyrir handsömun eða afskipti af lausagöngufé. Hins vegar var tekin fyrir kvörtun nokkurra íbúa sem telja mælinn fullan eftir ágang sauðfjár á lóðum sínum undanfarin ár. Í áðurnefndri gjaldskrá kemur fram að bæjarsjóður skuli innheimta gjöld sem eru ætluð til að standa undir kostnaði af lausagöngu búfjár. Við handsömun eða önnur afskipti af búfé þurfa búfjáreigendur, annars vegar að greiða 14.500 krónur fyrir hvert handsamað dýr, og hins vegar að láta af hendi 3.500 krónur í vörslugjald fyrir hvern byrjaðan sólarhring. Gjaldskráin hefur þegar tekið gildi.
Í kvörtuninni segir að lausaganga hafi verið látin viðgangast síðastliðin fjögur til fimm ár, „íbúum til mikils ama“. Þeir sem standa á bak við kvörtunina segjast ekki geta sett niður tré eða plantað blómum. Jafnframt hefur lausagönguféð valdið miklum sóðaskap á lóðum íbúanna. Búpeningurinn hefur oft migið og skitið á palla og stéttir þegar hann leitar skjóls við húsin. Við Gvendarhús mun hafa orðið varanlegt tjón á stétt þar sem skíturinn hefur skilið eftir sig varanlega græna slikju, sem ekki hefur tekist að hreinsa.
Íbúarnir fara fram á að eigendur búfénaðarins geri girðingar fjárheldar, en þær eiga að halda sig á beitilandi „austur við Dali“. Enn fremur er gerð krafa til bæjarins að svipta eigendur heimild til búfjárhalds ef úrbætur verða ekki gerðar. Í samþykkt um búfjárhald í Vestmannaeyjum segir: „Lausaganga búfjár er óheimil á Heimaey nema annað sé tekið fram.“ Með kvörtuninni fylgja myndir sem sýna skít, ullartægjur og áðurnefnda græna slikju.
