Garðyrkju- og umhverfisverðlaun veitt

Á opnu húsi Garðyrkjuskólans á Reykjum sumardaginn fyrsta var hátíðardagskrá þar sem Garðyrkjuverðlaun ársins 2026 og umhverfisverðlaun Hveragerðisbæjar voru afhent.

Garðyrkjuverðlaunin eru veitt í þremur flokkum, hvatningarverðlaun garðyrkjunnar, verknámsstaður ársins og heiðurverðlaun garðyrkjunnar. Hvatningarverðlaunin hlaut Tinna Bjarnadóttir, eigandi 1905 Blómahúss á Selfossi, verknámsstaður ársins var Gróðrarstöðin Mörk en eigendur hennar eru garðyrkjufræðingarnir Sigríður Helga Sigurðardóttir og Guðmundur Vernharðsson. Heiðursverðlaun garðyrkjunnar hlutu þau hjónin Sveinn A. Sæland og Áslaug Sveinbjarnardóttir, Espiflöt í Reykholti, Biskupstungum.

Garðyrkjuverðlaunin eru veitt af atvinnulífi garðyrkjunnar, Félagi skrúðgarðyrkjumeistara, SAMGUS, samtökum garðyrkju- og umhverfisstjóra sveitarfélaga, FIT, félagi iðn- og tæknigreina, Félagi garð- og skógarplöntuframleiðenda og Bændasamtökum Íslands. Umhverfisverðlaun Hveragerðisbæjar hlaut Kristmundur Hannesson, garðyrkjubóndi í Hveragerði.

Fjöldi garðyrkjunema verið í Mörk

Tinna Bjarnadóttir á og rekur 1905 Blómahús á Selfossi og hefur um langt árabil starfað með einum eða öðrum hætti við hönnun og framkvæmd blómalistaverka, eins og hún kýs að kalla það. Hún hefur sérhæft sig í skreytingum fyrir ýmsa viðburði og lagt sérstaka áherslu á brúðkaup.

Árið 2000 keyptu Guðmundur Vernharðsson og Sigríður Helga Sigurðardóttir gróðrarstöðina Mörk af stofnendum hennar og hafa rekið gróðrarstöðina fram á þennan dag. Guðmundur hóf fyrst störf árið 1978, hefur starfað þar nær samfellt síðan þá.

Heilsársstarfsmenn í stöðinni eru fjórir en yfir sumartímann verður heildarfjöldi starfsmanna alls 20 talsins. Fjöldi garðyrkjunema hefur verið í verknámi í Gróðrarstöðinni Mörk frá því Guðmundur og Sigríður tóku við stöðinni og hafa þau leitast við að nemendurnir fái sem besta innsýn í öll þau verk sem framkvæma þarf í garðyrkju. Vel hefur verið haldið utan um verknámsnemana og hafa þeir komið mjög vel undirbúnir undir starf garðyrkjufræðings eftir verknám í Mörk.

Hófu búskap fyrir 50 árum

Sveinn Sæland og Áslaug Sveinbjarnardóttir eru bæði menntaðir garðyrkjufræðingar frá Garðyrkjuskólanum á Reykjum, Sveinn útskrifaðist árið 1974 og Áslaug tveimur árum síðar.

Áslaug er fædd og uppalin á Hofstöðum í Garðahreppi og Sveinn er fæddur og uppalinn á Espiflöt í Biskupstungum. Þau kynntust við nám á Garðyrkjuskólanum og hófu svo sambúð og rekstur í félagsbúi með foreldrum Sveins, bróður hans og mágkonu, árið 1977. Árið 2013 hófust svo kynslóðaskipti yfir til þriðju kynslóðar, þegar Axel sonur þeirra og Heiða kona hans gengu inn í reksturinn og tóku síðan alfarið við honum nokkrum árum seinna.

Um næstu áramót eru liðin 50 ár síðan þau hófu búskap á Espiflöt. Þau hjónin vinna enn við reksturinn sem hefur haldið áfram að vaxa og dafna fram á síðustu ár.