Uppskerubrestur og hungur
Íbúar Afríkuríkjanna Eþíópíu, Sómalíu, Kenía og Eritreu hafa undanfarið barist við versta engisprettufaraldur sem herjað hefur á ríki í Afríku í áratugi. Uppskerubrestur og hungur blasir við.
General QU Dongyu, framkvæmdastjóri Alþjóða matvæla- og landbúnaðarstofnunar Sameinuðu þjóðanna, FAO, hefur sagt að ástandið sé grafalvarlegt og við blasi uppskeru- og fæðuskortur og hungur í löndunum verði ekkert gert.
Svarmur engispretta í Kenía er svo mikill að það dregur fyrir sólu. Mynd / FAO.
Engisprettufaraldurinn sem nú herjar á löndin er sagður sá versti í Sómalíu og Eþíópíu í 25 ár og sá versti í Kenía í 70 ár. Yfirvöld í Sómalíu hafa lýst yfir neyðarástandi í landinu vegna faraldursins.
FAO hefur farið fram á 76 milljón dollara, eða tæpan milljarð íslenskra króna, til hjálparstarfs vegna engisprettufaraldursins og sú upphæð kann að hækka talsvert breiðist faraldurinn út til Súdan og Úganda eins og hætta er talin á.
Stórir svarmar
Eyðimerkurengisprettur, Schistocerca gregaria, eins og þær sem um er að ræða, eru sagðar vera með skaðlegustu engisprettum og fara yfir stór svæði. Engispretturnar fara um í svörmum sem eru allt að ferkílómetri að stærð og geta á einum degi étið korn og annan nytjagróður sem mundi nægja um 35 þúsund manns. Engispretturnar fara hæglega yfir 150 kílómetra á dag og að jafnaði er um að ræða fimm kynslóðir á ári og étur hvert dýr um þyngd sína af gróðri á hverjum degi. Talið er að í lok janúar hafi engispretturnar skemmt uppskeru á meira en 5000 ferkílómetrum lands og þannig lífsviðurværi um 12 milljónir manna.
Engispretturnar éta allan gróður sem á vegi þeirra verður. Mynd / thenational.ae.
Ný kynslóð að klekjast út
Sérfræðingar FAO segja að sú kynslóð engispretta sem nú gengur yfir hafi þegar verpt og muni ný kynslóð engispretta herja á löndin fljótlega og gera ástandið enn verra en það er í dag. Vegna þessa hefur eftirlit með fjölgun engisprettna verið aukið í Óman, Sádi-Arabíu og Jemen.
Að sögn eftirlitsaðila á svæðum þar sem engispretturnar hafa farið yfir er ástandið víða mjög slæmt.
Dæmi um það er að í Kenía fór svarmur sem var 60 kílómetra langur og 40 kílómetra breiður yfir norðurhérað landsins og át upp nánast allan gróður á svæðinu, hvort sem það var nytjagróður bænda eða beitarplöntur búfjár.
