Franskir nemendur í starfsnám á íslenskum sveitabæjum

Jennifer Broussy, kennari í landbúnaðargagnfræðiskóla í suðvesturhluta Frakklands, tekur nú, ásamt nemendum sínum, þátt í Evrópuverkefni sem felst í því að senda nemendur frá sér á aldrinum 16 til 18 ára til Íslands í tvær vikur til að starfa á sveitabæjum vorið 2018. 

 

Nemendurnir eru í bóklegu og verklegu námi við hesta- og sauðfjárrækt ásamt kúabúskap og fá að því loknu prófskírteini fyrir starfsnámið. Þannig skiptist námið í bæði bóklega og verklega þætti þar sem starfsnámið fer fram á bóndabæjum í Frakklandi og á Íslandi.

 

„Ég hef skipulagt álíka verkefni í sjö ár en við höfum farið til Englands sex sinnum og komum til Íslands árið 2015 í samstarfi við Landbúnaðarháskólann á Hvanneyri. Nú er stefnan hjá okkur að koma í lok mars á næsta ári til Íslands og dvelja í tvær vikur með 15 nemendur. Þess vegna leita ég nú að íslenskum bændum sem væru til í að taka við einum til tveimur nemendum á hverjum sveitabæ frá mér í tvær vikur. Ég er sérstaklega að horfa til sauðfjár- og kúabúa ásamt hestabýlum í kringum Borgarnes eða á Snæfellsnesi,“ útskýrir Jennifer og segir jafnframt:

„Þetta er ólaunað tímabil fyrir nemendurna og er hugsað til að hjálpa þeim við að auka kunnáttu sína á hestum, kúm og sauðfé ásamt því að öðlast með þessu starfsnámi ákveðna sérþekkingu. Við greiðum 3300 íslenskar krónur á dag fyrir hvern nemenda fyrir fæði og uppihald. Skipulagið er þannig að nemendurnir starfa á sveitabænum frá mánudegi til föstudags en á laugardegi til sunnudags er farin ferð með þá. Við kennararnir verðum á Íslandi á þessu tímabili og viljum gjarnan heimsækja sveitabæina til að ganga úr skugga um að allt gangi snurðulaust fyrir sig. 

 

Tvær vikur - lok mars og byrjun apríl

 

Nemendurnir verða hér frá 26. mars – 7. apríl. Ef þú ert bóndi með kúa- eða sauðfjárbú og hesta eða með blandað bú og hefur áhuga á að fá til þín franska nemendur í starfsnám vinsamlega hafið samband við Jennifer Broussy á jennifer.broussy@yahoo.co.uk.