Flytur inn fræ af iðnaðarhampi

Landstólpi ætlar að flytja inn 300 til 500 kíló af iðnaðarhampsfræi fyrir sumarið en rúmlega 30 aðilar hafa sýnt áhuga á að rækta plöntuna í sumar. Mast og Lyfjaeftirlitið hafa gefið vilyrði um að flýta afgreiðslu leyfa fyrir innflutningunum.

Með reglugerðarbreytingu heilbrigðisráðherra er leyfilegt að rækta iðnaðarhamp hér á landi líkt og í löndunum í kringum okkur. Ræktun hampsins er háð ýmsum takmörkunum og óvíst að margir geti nýtt sér leyfið þar sem langt er liðið á vorið.

Rúnar Skarphéðinsson, sölustjóri búrekstrardeildar Landstólpa, sem meðal annars flytur inn sáðvöru, segir að stutt sé síðan reglugerðinni var breytt og málin hafa gengið hratt fyrir sig síðan þá. „Ég fékk fljótlega fyrirspurnir frá áhugasömum ræktendum um hvort Landstólpi ætlaði að flytja inn fræ fyrir sumarið en eftir að hafa haft samband við nokkra birgja taldi ég litlar líkur á að svo yrði.“

Rúnar Skarphéðinsson, sölustjóri búrekstrardeildar Landstólpa.

Flutt inn frá Finnland

„Ég hélt samt áfram að reyna að vinda ofan af málinu og niðurstaðan var sú að ég komst í samband við tékkneskt fyrirtæki sem er með nokkur yrki af iðnaðarhampi í boði og það kom mér í samband við finnskt fyrirtæki sem heitir Fonola sem getur selt okkur fræ. Fræin eru af yrkinu 'Finola' sem hefur reynst ágætlega hjá bændunum í Gautavík í Berufirði.

Mast og Lyfjaeftirlitið hafa gefið okkur vilyrði um að flýta afgreiðslu leyfa fyrir innflutningunum.“
Rúnar segir að um 30 pantanir hafi borist og að þær sái á bilinu eitt til til tíu kíló og svo aðrir sem ætla að sá í hálfan eða einn hektara.

300 til 500 kíló

„Mér sýnist magnið sem við komum til með að flytja inn að þessu sinni vera á bilinu 300 til 500 kíló. Ég vonast til að sendingin berist til landsins 18. til 20. maí enda má það ekki vera mikið seinna svo að plantan nái að þroskast hér á landi.“

Verð á kílói er 2.537 krónur og er það jafnframt minnsta pöntun.