Flytja fjarlægar stórár í vatnsból Aþenu

Vaxandi vatnsskortur í Grikklandi hefur leitt til umfangsmikilla aðgerða stjórnvalda á sama tíma og andstaða magnast vegna áforma um að beina vatni frá tveimur fjallaám til vatnsbóla Aþenu.

Forsætisráðherra Grikklands, Kyriakos Mitsotakis, hefur varað við því að landið verði að undirbúa sig „fyrir verstu mögulega sviðsmynd“ vegna þurrka síðustu ára og versnandi loftslagsáhrifa á Attíkíu, þar sem 4,4 milljónir íbúa búa. Hann sagði í samtali við fréttastofuna France 24 algjörlega skýrt að hvorki snjór né rigning myndu leysa vandann.

Hið alvarlegasta mál

Til að bregðast við stöðunni hefur ríkisstjórnin kynnt tíu ára aðgerðaáætlun upp á 2,5 milljarða evra, sem miðar að því að styrkja vatnsöflun Aþenu og tryggja aðgengi að drykkjarvatni um land allt. Umhverfis- og orkumálaráðherrann Stavros Papastavrou kynnti áætlunina og sagði hana fela í sér metnaðarfullar aðgerðir til að mæta langvarandi vatnstapi, minni úrkomu og aukinni uppgufun sem hefur leitt til rýrnunar vatnsbirgða um 250 milljónir rúmmetra árlega frá 2022, skv. gríska fréttamiðlinum Ευρυτανικά Νέα. Úrkoma hefur minnkað um 25% og uppgufun aukist um 15%.

Ráðherrann benti á að Grikkland væri nú í 19. sæti í heiminum yfir ríki sem standa frammi fyrir verulegum vatnsskorti og að það gæti haft alvarleg áhrif á yfir helming landsmanna á komandi árum. Meðal mótvægisaðgerða eru stórframkvæmdir í vatnsöflun Aþenu og aukin uppbygging afsöltunarstöðva fyrir eyjar, sérstaklega þær sem líða mest fyrir vatnsskort yfir háannatímann þegar íbúafjöldi margfaldast.

Fjarlægar ár leiddar til Aþenu 

Á sama tíma og stjórnvöld boða stórfelldar framkvæmdir til verndar vatnsöryggi landsins eru hávær mótmæli í fjallahéruðum Evrýtaníu. Þar hefur verið safnað undirskriftum gegn svonefndri Evrýtos-áætlun stjórnvalda, sem felur í sér að vatni verði veitt um og yfir 300 km leið frá ánum Krikeliotis og Karpenisiotis til Evinos-vatnsbólsins sem þjónar Aþenu.

Undirskriftasöfnunin er að undirlagi samtaka hótelrekenda í Evrýtaníu, en í umsögn þeirra segir að fyrirhuguð breyting myndi valda óafturkræfum skaða á náttúru svæðisins og sjálfsmynd þess. Þar er bent á að um sé að ræða viðkvæm vistkerfi sem muni illa þola breytt vatnsrennsli.

Jafnframt er tekið til þess að ferðaþjónusta á svæðinu, þar sem útivist, siglingar og náttúruferðamennska eru stór þáttur í atvinnulífinu, muni verða fyrir umtalsverðu tjóni ef vatnsrennsli veikist. Íbúa- og fagfélög fullyrða að vatnsvernd fjallabyggða eigi ekki að víkja fyrir þörfum stórborgarinnar og minna á að til séu aðrar leiðir svo sem vatnssparnaður, endurnýting og afsöltun sem geti leyst vandann án þess að fórna fjallasvæðum.

Er þess krafist að áformin verði stöðvuð og báðar árnar friðlýstar.

Sömuleiðis hefur verið bent á að betur færi á að draga úr notkun á vatni í einkasundlaugar sem séu í tugþúsundatali við hina grísku strandlínu Miðjarðarhafsins.