Fljúgandi bolabítur
Skömmu eftir miðja nítjándu öld lýsti Alfred Russel Wallace, sem var samtímamaður Charles Darwin, óvenjustórri flugu sem hann fann á eyjunni Bacan sem tilheyrir Maluku-eyjaklasa Indónesíu.
Vallance varðveitti eitt kvenkyns eintak og lýsti því sem óvenju stórri svartri og vespulíku skordýri með stóra og sterklega kjálka eins og hjartarbjalla. Paddan, sem hlaut heitið risa byflug Wallace, Megachile pluto, er fjórum sinnum stærri en venjuleg humla og með allt að 64 millimetra vænghaf.
Lengi von á einum
Lítið fór fyrir flugunni eftir að Wallace lýsti henni og rúm öld leið þar til henni var lýst aftur.
Árið 1981 fannst eitt bú ekki langt frá staðnum sem Wallace fann fluguna sem hann greindi en síðan hvarf hún af sjónarsviðinu. Jafnvel var talið að tegundin væri útdauð í kjölfar skógareyðingar vegna ræktunar olíupálma.
Svo skaut flugunni upp aftur þegar tvö dauð eintök af henni fundust á safni í Hollandi og hafði þeim verið safnað 1991. Sama ár voru svo tvö dauð eintök boðin söfnurum til sölu.
Fréttirnar um dauðu eintökin þóttu bæði góðar og slæmar. Það var jákvætt að paddan hafði fundist árið 1991 en neikvætt að öll eintökin voru dauð.
Bú finnst
Árið 2019 var gerður út leiðangur til að finna fluguna og eftir að hafa sýnt innfæddum mynd af henni leiddu þeir leiðangursmennina að búi skammt frá þorpinu. Fljótlega kom í ljós að innfæddir höfðu alltaf vitað af henni enda ekki auðvelt að verða ekki var við hana vegna stærðarinnar. Heiti hennar á máli innfæddra er raja ofu, eða flugnahöfðinginn.
Safnarar greiða hátt verð
Eftir að búið fannst hafa skordýrasafnarar boðið hátt verð í eintök af heillegum flugum enda er hún á lista yfir tegundir í bráðri útrýmingarhættu. Að minnsta kosti eitt eintak af henni hefur verið selt fyrir jafngildi einnar og hálfrar milljónar króna.
