Fasteignafyrirtæki kaupir Lambhaga
Viðræður um kaup fasteignafélagsins Eikar hf. á garðyrkjustöðvunum Lambhaga í Úlfarsárdal og Lundi í Mosfellsdal eru í lokaferli.
Ákvörðun endanlegs kaupverðs er háð fyrirvörum, meðal annars um framkvæmd og niðurstöður áreiðanleikakannana, en að óbreyttu gæti heildarvirði hins selda í viðskiptunum numið allt að 4.230 milljónum króna. Kaup Eikar á Lanbhaga sýna aukinn áhuga stórra fjárfesta á matvælaframleiðslu.
Lambhagi er löngu landsþekktur fyrir framleiðslu sína á Lambhagasalati og kryddi og stærsti framleiðandi salats á landinu. Hafberg Þórisson, eigandi Lambhaga, stofnaði stöðina árið 1979. Kaupverðið er áætlað rúmir 4,2 milljarðar króna.
Lambhagavegur 23 á 11.944 fermetra gróðurhús í Úlfarsárdal í Reykjavík auk íbúðarhúsnæðis og Laufskálar eiga lóð og fasteign í Lundi í Mosfellsdal, sem er 6.821 fermetri auk 14.300 fermetra byggingarheimildar. Í atvinnuhúsnæði félaganna fer fram grænmetisrækt Lambhaga ehf. sem einnig er í eigu seljanda.
Fasteignamat rúmir 1,3 milljarðar
Með í kaupunum fylgir nýleg starfsemi fyrirtækisins að Lundi í Mosfellsdal með nýjum gróðurhúsum og tæknibúnaði. Fasteignamat eignanna árið 2023 er rúmlega 1,3 milljarðar króna. Samkvæmt fasteignamati Þjóðskrár fyrir árið 2023 er fasteignamat Lambhaga tæplega 790 milljónir en Lundar í Mosfellsdal 513 milljónir króna.
Samkvæmt ársreikningi var 38 milljóna króna tap á rekstri Lambhaga árið 2020 en á árunum 2017 til 2019 hagnaðist fyrirtækið um 94 milljónir króna. Ársreikningur fyrir 2021 liggur ekki fyrir.
Eina lögbýlið innan borgarmarkanna
Lambhagi er vel staðsett í Úlfarsárdal og því geysilega verðmætt land sem
gæti orðið byggingarland í náinni framtíð. Bæði Lundur og Lambhagi eru lögbýli. Munurinn á lögbýli og annars konar býlum felst meðal annars í því að lögbýlum fylgir lagaleg festa og ekki er hægt að brjóta þau upp með eignarnámi nema eftir lögformlegum leiðum.
Staða lögbýla er sterk í Evrópu og litið á þau sem fæðuframleiðslusvæði sem ekki má taka undir byggingarland nema við mjög sérstakar aðstæður og langt og strangt ferli.
Sáttur við kaupverðið
Hafberg Þórisson, garðyrkjubóndi og eigandi Lambhaga og Lundar, segir að þrátt fyrir að kaupin séu enn í ferli eigi hann ekki von á að þau gangi eftir.
„Mér skildist að samþykki ætti að liggja fyrir í lok síðustu viku en núna skilst mér að þar vanti formlegt samþykki hluthafafundar fyrir kaupunum sem verður haldinn í byrjun næstu viku.“
Fasteignafélagið Eik hf. kaupir land og húsnæði Klappar sem er
eignarhaldsfélag sem heldur utan um eignir Lambhaga og Lundar. Síðan er hugmyndin að selja eða leigja reksturinn án þess að ég geti sem stendur sagt hver komi til með að gera það.“
Að sögn Hafbergs fékk hann úthlutað landi við Lambhaga árið 1977 og hefur rekið þar garðyrkjustöð frá 1979, en hann keypti Lund í Mosfellsdal árið 2007 og hóf uppbyggingu þar.
Hafberg segist vera sáttur við kaupverðið. „Þetta leggst vel í mig og ég held eftir skika af Lundi og ætla að reisa mér hús þar og njóta lífsins. Ég fylgi ekki með í kaupunum og ætla að láta öðrum eftir reksturinn og áframhaldandi uppbyggingu stöðvanna.“
Vænleg fjárfesting
Garðar Hannes Friðjónsson, forstjóri fasteignafélagsins Eikar, sagði í samtali við Bændablaðið að hugmyndin væri að báðar garðyrkjustöðvarnar yrðu leigðar áfram til rekstraraðila sem héldi
áfram rekstri í þeim. Samhliða kaupum Eikar á fasteignunum mun því annar aðili kaupa reksturinn.
„Fjárfestingin býður upp á vænlega arðsemi auk stuðnings við íslenska matvælaframleiðslu. Það er mat okkar að matvælaframleiðsla sé vaxandi atvinnugrein á Íslandi sökum fjölgunar íbúa og ferðamanna, auk þess sem viðskiptin falla vel að yfirlýstum markmiðum stjórnvalda, um að auka sjálfbærni og efla fæðuöryggi.“
Í tilkynningu frá fasteignafélaginu Eik hf. vegna viðræðna um kaupin segir að Eik fasteignafélag hf. hafi skrifað undir samkomulag um helstu skilmála kaupsamnings um allt útgefið hlutafé í Lambhagavegi 23 ehf. og Laufskálum fasteignafélagi ehf.
Samkomulagið felur jafnframt í sér einkarétt til að vinna með seljanda og ráðgjöfum hans við að ná endanlegu samkomulagi um viðskiptin og klára kaupsamningsgerð og áreiðanleikakönnun. Bæði félögin eru að fullu í eigu Klappar eignarhaldsfélags ehf.
