Eru ESB-reglur að gera vínflöskuna ólöglega?
Nýjar reglur Evrópusambandsins um að draga úr umbúðaúrgangi hafa vakið áhyggjur meðal evrópskra glerframleiðenda og framleiðenda áfengis. Samkvæmt reglunum, sem taka gildi árið 2030, verða fyrirtæki skylduð til að lágmarka efnisnotkun í umbúðum sínum. Gleriðnaðurinn óttast að reglurnar geti dregið úr sérstöðu þekktra vörumerkja og takmarkað möguleika framleiðenda til að nota sérhannaðar flöskur sem hluta af markaðssetningu sinni.
Framleiðendur vína og sterkra drykkja í Evrópu hafa um árabil lagt mikla áherslu á útlit og hönnun flaskna sem hluta af ímynd vörumerkja sinna. Samkvæmt glerframleiðendum eru flöskurnar ekki aðeins umbúðir heldur hluti af sögu og sjálfsmynd vörunnar. POLITICO Europe segir frá.
Emmanuel Ladent, forstjóri franska glerfyrirtækisins Saverglass, bendir á að fyrirtækið hafi framleitt einkennandi flöskur fyrir Grey Goose-vodka í tvo áratugi. Að hans sögn þekki neytendur vöruna meðal annars á tæru gleri, lögun flöskunnar og skreytingum hennar. Hann óttast að slík sérkenni verði í hættu ef reglurnar verði túlkaðar mjög þröngt.
Markaðssjónarmið duga ekki lengur
Markmið Evrópusambandsins er að draga úr því mikla magni umbúða- úrgangs sem fellur til ár hvert. Árið 2023 mynduðu Evrópubúar tæplega 80 milljónir tonna af umbúðaúrgangi, sem samsvarar um 177 kílóum á mann. Samkvæmt reglunum verður markaðssetning ein og sér ekki talin næg ástæða fyrir notkun umframumbúða eða meira efnis en nauðsynlegt er.
Glerframleiðendur segja hins vegar að hætta sé á að reglurnar leiði til einsleitni í framsetningu vara, meðal annars í vín-, áfengis- og ilmvatns- iðnaði. Þeir benda á að greinin standi þegar frammi fyrir miklum kostnaði vegna orkuskipta og kolefnislosunar- markmiða og telja að viðbótarregluverk geti dregið úr samkeppnishæfni evrópskra fyrirtækja.
Áhyggjurnar ná einnig til smærri framleiðenda. Í Bretagne-héraði í Frakklandi hefur handverksbrugghúsum og eimingarhúsum fjölgað á undanförnum árum. Etienne Jacques hjá Moby Dick-eimingarhúsinu í Plogoff segir að framsetning vörunnar skipti máli samhliða gæðum innihaldsins. Fyrirtækið noti þykkar glerflöskur með sérstökum merkimiðum og trétappa en jafnframt hafi verið komið upp kerfi þar sem viðskiptavinir geti skilað flöskum til endurnýtingar gegn endurgjaldi.
Ímyndin byggir á útlitinu
Samkvæmt upplýsingum frá Evrópusamtökum glerumbúða- framleiðenda (FEVE) starfa um 50 þúsund manns við framleiðslu glerumbúða í Evrópu og greinin lagði um 6,5 milljarða evra til hagkerfis Evrópusambandsins árið 2022. Samtökin segja mikilvægt að framleiðendur geti áfram þróað sérkenni vara sinna og haldið samkeppnisstöðu sinni á markaði.
Talsmenn iðnaðarins benda á að margar þekktar vörur byggi ímynd sína að stórum hluta á útliti umbúðanna. Þeir nefna meðal annars Amaretto Disaronno, Aperol, Corona-bjór og ilmvatnið Chanel N°5 sem dæmi um vörur þar sem glerumbúðirnar séu órjúfanlegur hluti af vörumerkinu sjálfu.
Deilan snýst því um hvar jafnvægið eigi að liggja milli markmiða um minni úrgang og umhverfisáhrifa annars vegar og frelsis framleiðenda til að skapa sérstöðu og verðmæti í gegnum hönnun umbúða hins vegar.
