Dýralæknanám í fyrsta skipti á Íslandi
Landbúnaðarháskóli Íslands (LBHÍ) ætlar í haust að bjóða upp á nám í dýralækningum með áherslu á dýraheilbrigði í samvinnu við hinn virta SGGW háskóla í Varsjá.
Um er að ræða tveggja ára diplómanám, sem hefur það meginmarkmið að undirbúa nemendur til starfa og áframhaldandi náms á sviði búvísinda og dýraheilbrigðisvísinda. Námið er sniðið að því að nemendur geti sótt um inngöngu beint á þriðja ár dýralæknanáms í skólanum í Varsjá en nýlega var undirritaður samningur milli LbhÍ og SGGW um að nemendur sem lokið hafa diplómanámi í búvísindum með áherslu á dýraheilbrigði frá LbhÍ geti sótt um að fara beint inn á þriðja ár á námsbraut í dýralækningum við SGGW. Heildarlengd dýralæknanámsins við SGGW eru fimm og hálft ár.
„Það er erfitt að áætla hversu margir munu sækja um að fara þessa leið að dýralæknanámi en ekki verður hægt að taka við fleiri en 18 nemendum. Ef umsækjendur sem uppfylla inntökuskilyrði verða færri en 10 verður ekki fjárhags- grundvöllur til að bjóða upp á þessa leið. En það er margvíslegur ávinningur af því að velja þennan valkost. Í fyrsta lagi má nefna að nemendur munu öðlast góða þekkingu á íslenskum landbúnaði á fyrstu tveimur árunum og munu búa að því að námi loknu. Í öðru lagi fá nemendur tækifæri til að stunda nám í góðum skóla í Póllandi með áhugaverðu og öflugu fagumhverfi. Í þriðja lagi er þetta góður kostur fyrir þau sem ekki treysta sér til eða hafa ekki tök á að fara beint til útlanda í langt nám,“ segir Auður Lilja Arnþórsdóttir hjá Landbúnaðarháskóla Íslands á Hvanneyri.
