Covid og kannabis
Samkvæmt nýlegum rannsóknum vísindamanna Oregon State-háskóla Bandaríkjanna, hefur komið fram að efnasambönd hampplöntunnar geti mögulega komið í veg fyrir útbreiðslu veirunnar Covid-19.
Efnasamböndin cannabigerolic sýra, eða CBGA, og cannabidiolic sýra, eða CBDA, geti með því að bindast gaddapróteinum SARS-CoV-2 veirunnar sem veldur Covid-19, minnkað möguleika eða jafnvel komið í veg fyrir framgengi smita og sýkingu.
(SARS stendur fyrir Severe Acute Respiratory Syndrome, eða á íslensku; heilkenni alvarlegrar bráðrar lungnabólgu.)
Rannsókninni er stýrt af vísindamanninum Richard van Breemen, en hann telur gögn er komið hafa fram sýna jákvæð áhrif CBDA og CBGA gegn þeim tveimur afbrigðum Covid-veirunnar sem rannsökuð voru – og vonast sé til þess að sú virkni nái til annarra núverandi og framtíðarafbrigða.
Þótt frekari rannsókna sé þörf lítur út fyrir að hægt sé að þróa lyf sem kemur þá í veg fyrir eða meðhöndlar Covid-19 með því að hindra inngöngu veirunnar og jafnvel í bland við bólusetningar ætti sú meðferð að verða til þess að aðstæður verði veirunni afar krefjandi. Van Breemen tekur fram að enn geti þó ónæm afbrigði komið upp en líklegt sé að þau eigi þá erfitt með að dreifa sér.
Nánari upplýsingar má lesa á vefsíðu Forbes, www.forbes.com og ef lesendur eru forvitnir um jákvæð áhrif kannabisplöntunnar í tengslum við Covid-19 má sjá grein á vefsíðu Open Access Government www.openaccessgovernment.org, sem sett var inn fyrir ári síðan.
