Búvís hlaut Hvatningarverðlaun Búnaðarsambands Eyjafjarðar
Höfundur: Margrét Þóra Þórsdóttir
Búnaðarsamband Eyjafjarðar veitir árlega viðurkenningu fyrir sérstakt framtak tengt landbúnaði og eða úrvinnslu landbúnaðarafurða sem stuttlega var greint frá í síðasta Bændablaði.
Miklar vangaveltur voru um hver skyldi hljóta hvatningarverðlaun Búnaðarsambands Eyjafjarðar þetta árið og varð niðurstaðan sú að viðurkenningin féll í skaut fyrirtækinu Búvís sem er til húsa í Grímseyjargötu 1 á Akureyri.
Viðurkenningin getur verið fyrir vel unnin störf, athyglisverða nýjung eða einstakan árangur. Viðurkenninguna geta einstaklingar, félög, fyrirtæki og stofnanir hlotið.
Verð á áburði lækkaði
Búvís var stofnað 2006 en í um það bil 2 ár áður höfðu eigendur þess verið að flytja inn og selja vörur til bænda undir nafninu Lambás sem var fyrirtæki sem Gunnar Guðmundsson í Sveinungsvík í Þistilfirði var með fyrir sinn búrekstur, en ásamt honum er Einar bróðir hans eigandi Búvís.
Búvís hefur selt áburð frá árinu 2009 og ljóst er að með innkomu þeirra á þann markað hafi verð á áburði til bænda lækkað og þeir verið leiðandi á markaðnum í að reyna að halda áburðarverði lágu.
Byggðu nýtt hús undir starfsemina
Árið 2012 var núverandi húsnæði félagsins byggt undir starfsemina að Grímseyjargötu 1 en áður hafði hún verið í bílskúrnum hjá Einari og í Sveinungsvík.
Segja má að upp úr því hafi fyrirtækið tekið talsvert stökk og orðið mun sýnilegra og meira áberandi á markaði.
Allar götur síðan hafa þeir verið að auka umsvif í vörum til nota í landbúnaði, gróflega áætlað skiptast söluþættir í þrjá hluta, þar sem áburður er stærstur, þá rúlluplast og síðan ýmiss konar vélar og tæki ásamt margháttaðri smávöru.
Alls starfa 6 manns hjá Búvís, en á álagstímum er starfsfólki fjölgað. Þá eru 22 söluaðilar eða lagerhaldarar á rúlluplasti víða um land.
Augljós áhrif
„Þeir bræður stofnuðu þetta norðlenska fyrirtæki frá núllpunkti og hafa komið því í sterka stöðu á rúmlega áratug og ein aðalástæða þess að þeir hljóta Hvatningarverðlaun BSE er að augljós eru þau áhrif sem innkoma þeirra á landbúnaðarvörumarkað hefur haft á verð til bænda,“ sagði Sigurgeir Hreinsson, framkvæmdastjóri Búnaðarsambands Eyjafjarðar, við afhendingu viðurkenningarinnar.
