7.000 krónur fyrir skottið af ref
Bláskógabyggð greiðir nú 7.000 krónur fyrir skottið sé refur veiddur í sveitarfélaginu og 3.000 krónur fyrir unninn mink.
Fyrir yrðlinga hjá refnum eru það 1.600 krónur á dýr en fyrir hvolpafulla læðu hjá mink eru það 15.000 krónur á dýr.
Sveitarfélagið fær endurgreitt frá ríkinu hlutdeild af viðmiðunartöxtum í samræmi við heimildir í fjárlögum. Hámarksendurgreiðsla er 700.000 krónur á ári. Ekki eru til skriflegir samningar um veiðar á mink og ref fyrir Bláskógabyggð en óformlegir samningar eru við aðila sem sinna mismunandi svæðum, eins og Þingvallasveit, Laugardal og Biskupstungum.
„Það getur hver sem er komið með skott og fengið borgað, en síðan erum við líka með veiðimenn, sem ganga á greni. Fjöldi veiddra refa frá september 2024 og út ágúst 2025 voru 107 fullorðin dýr og 50 yrðlingar hjá refum og minkarnir, sem voru veiddir voru 21,“ segir Ásta Stefánsdóttir, sveitarstjóri Bláskógabyggðar.
Þá má geta þess að tímakaup til ráðinna veiðimanna er 1.615 krónur á klukkustund og greiddar eru 110 krónur í akstur á hvern kílómetra. Um er að ræða taxta frá Umhverfisstofnun fyrir veiðar á mink og ref frá árinu 2000 og hefur hann ekki tekið neinum breytingum síðan þá.
