Flekkur kom úr langferð á jólaföstu
Hér á bæ fæddist svartflekkóttur lambhrútur 14. maí 2021, fremur smár tvílembingur undan ánni Syllu 15-555.
Faðirinn var Skandall 19-035, bæði vel ættuð, m.a. út af þekktum kynbótahrútum frá Hesti, Bjarnastöðum og Haukatungu. Í október var Flekkur seldur út á Reykjanesskaga ásamt fleiri lömbum. Nú á jólaföstunni gerðist svo þetta, rúmlega þrem árum síðar:
Þann 12. desember hringir til okkar Ólafur R. Dýrmundsson, fjáreigandi í Reykjavík og markavörður Ingólfsskrár, og spyr hvort við söknum fullorðins, flekkótts hrúts með bæjarnúmer Morastaða á lambamerki, ekkert fullorðinsmerki sé í honum. Hrútinn hafi Brynjófur H. Ásþórsson fjáreigandi í Fjárborg fundið fyrr um daginn við vörslugirðingu Norðurhólfs, norðan Suðurlandsvegar, nánar tiltekið á bakka Fossvallaár nyrðri um tvo kílómetra ofan Lögbergsbrekkunnar. Eftir spjall við Ólaf og hringingar suðureftir fundum við út að núverandi eigandi væri með kindur í Grindavík og í kjölfarið komst hann í samband við Brynjólf sem hafði þá flutt þann flekkótta niður í Fjárborg. Þar var hrúturinn feginn að fá hey og vatn þangað til eigandinn sótti hann.
Flekkur var greinilega kominn úr langferð um fjöll og hraun, orðinn aflagður og haltur. Hann hafði sést í sumar við kirkjuna í Krýsuvík, þá kominn austur fyrir Grindavíkurhólfið, og fengum við þær upplýsingar frá þeim Ólafi og Brynjólfi, sem eru kunnugir víða á svæðinu, að sennilega hafi Flekkur lagt að baki allt að 50 kílómetra. Ólafur, sem er fjallskilastjóri fyrir Reykjavík og Kópavog, fékk þær ábendingar frá útivistarfólki í haust að flekkóttur hrútur hafi sést við
mynni Jósefsdals um miðjan nóvember og aftur í skarðinu á milli Sandfells og Selfjalls, austur af Heiðmörk, í lok nóvember. Í bæi skiptin var leitað án árangurs. Að áliti þeirra félaga hefur Flekkur sennilega haldið lengi í norðaustur, meðfram Kleifarvatni, um Lönguhlíðar, hugsanlega um Brennisteinsfjöll, síðan um Grindaskörð út eftir Bláfjöllum allt til Vífilsfells. Ef til vill fór hann norður Jósefsdal. Úr skarðinu á milli Sandfells og Selfjalls, töluvert vestar, telja þeir fullvíst að Flekkur hafi farið um Lakheiði svo til beint til norðurs þangað til vörslugirðingin stöðvaði för höfðingjans.
Var ekki Flekkur einfaldlega að sýna þá visku og ratvísi sem íslenska sauðkindin er þekkt fyrir? Allavega erum við Ólafur sammála um að hann hafi verið á leiðinni norður að Morastöðum og í æskuhagana í Eyrarfjalli, nú kominn á fjórða vetur. Skemmtilegt jólaævintýri í hugum okkar.
