Yfir 700 þúsund seiði afhent í ágústmánuði
Í ágústmánuði, sem er nú senn á enda, hefur Thor landeldi í Þorlákshöfn afhent um 700 þúsund laxaseiði en mjög góður gangur hefur verið í seiðaframleiðslu félagsins í Þorlákshöfn frá því fyrstu seiðin voru afhent í maí.
Háafell í Ísafjarðardjúpi fékk 300 þúsund seiði nú í ágúst og 400 þúsund seiði fóru til annarra viðskiptavina fyrirtækisins. Þegar þessum afhendingum lýkur verður Thor landeldi búið að afhenda um 1,5 milljónir seiða í sumar.
„Það er mjög ánægjulegt að sjá hversu vel seiðaeldið gengur. Við framleiðum og afhendum seiði til viðskiptavina en jafnframt ölum við seiði fyrir eigið áframeldi. Afhendingarnar í sumar hafa gengið vel og marka mikilvægan áfanga í uppbyggingu starfseminnar,“ segir Steinþór Pálsson, forstjóri Thor landeldis.
Seiðastöðin hefur verið í fullum rekstri frá síðustu áramótum og getur framleitt fjórar milljónir seiða á ári. Með þeirri framleiðslugetu getur stöðin annað seiðaþörf Thor landeldis vegna 20.000 tonna árlegrar framleiðslu á sláturfiski.
Frá upphafi hefur verið gert ráð fyrir að stöðin gegni tveimur hlutverkum fyrstu árin eða annars vegar að framleiða seiði til sölu til annarra fiskeldisfyrirtækja og hins vegar seiði fyrir eigið áframeldi félagsins.
