Veikindi í hestum á Norðurlandamóti íslenska hestsins í Svíþjóð
Veikindi komu upp í hrossum danska landsliðsins á nýafstöðnu Norðurlandamóti íslenska hestsins í Svíþjóð. Öflugar smitvarnir voru til staðar á mótinu og komu í veg fyrir útbreiðslu smitsins.
Á vef Matvælastofnunnar (MAST) kom fram að á alþjóðlegum mótum sem þessum séu hross frá hverju landi hýst aðskilin og líkamshiti þeirra mældur tvisvar á dag. Þetta verklag hafi verið til þess að veikindin uppgötvuðust senmma og smitið virðist hafa haldist innan afmarkaðs hóps.
Við sýnatöku hafi verið hægt að útiloka alvarlega smitsjúkdómavalda eins og EHV-1 og EIV (hestainflúensu) og anaplasmósu, bakteríusjúkdóm sem berst með skógarmítlum og einkennist meðal annars af háum hita. Einnig var hægt að útiloka eCov sem er hin svokallaðahitasótt sem þekkist hér á landi síðan 1998. Ekki er því vitað hvort veikindin séu af annarri orsök, svo sem fóðri
Hættan á smiti raunveruleg
MAST áréttar í tilkynningu sinni að hestamenn sem taki þátt í mótum fyrir utan landsteinana þurfi að vera meðvitaðir um smitvarnir. Framkvæmdastjóri LH hafi sagt MAST að allir þátttakendur á mótinu hafi verið meðvitaðir um stöðu mála og hvaða smitvarnarráaðstöfunum ætti að fylgja við heimkomu.
Ýtrustu kröfur séu í gildi hér á landi til að verjast smitsjúkdómum í dýrum og sérstaklega hrossum, enda innflutningur þeirra með öllu óheimill, sem og reiðtygja og reiðhanska. Annan reiðfatnað má taka með sér aftur heim. Reynslan sýni að berist smit til landsins breiðist það hratt út hér á landi, enda íslenski hrossastofninn einangraður og með takmarkað ónæmi gegn mörgum þeim sjúkdómum sem finnast erlendis.
Matvælastofnun bendir öllum hestamönnum á að kynna sér leiðbeiningar á heimasíðu stofnunarinnar og leiðbeina erlendum gestum og ferðamönnum á sínum vegum.
