Sumarkokteill Bændablaðsins og Drykk bar

Bændablaðið fékk Róbert Aron Garðarsson Proppé á Drykk Bar til liðs við sig til þess að hanna íslenskan sumarkokteil. Róbert er Íslandsmeistari barþjóna, hann er ákafur grúskari í kokteilagerð og ástríðan skein í gegn þegar hann fræddi blaðamann um hvernig hann paraði saman bragðtegundum í drykkina. Hann tekur þátt í heimsmeistaramóti barþjóna í Kólumbíu næstkomandi nóvember.

Róbert hannaði tvo kokteila fyrir Bændablaðið, einn óáfengan og einn áfengan. Þemað var íslenskt sumar en í drykkjunum eru kryddjurtir framleiddar af íslenskum garðyrkjubændum og Himbrimi Winterbird Edition Gin frá Brunni Distillery.

Ásamt uppskriftum að kokteilum fylgja leiðbeiningar um það hvernig skal gera heimagerðan rabarbara bitter eins og Róbert notar á barnum sem gefur skemmtilegan íslenskan blæ. Lesendur geta heilsað upp á Róbert á Drykk bar á Pósthússtræti og pantað þann sumarkokteil sem þeir girnast eða blandað þá heima hjá sér eftir uppskrift og notið í sumarblíðunni.

Sumarkokteill

60 ml Himbrimi Winterbird Edition Gin
25 ml límónusafi
3–4 dropar rabarbara bitter
5–6 basilíkulauf
5–6 myntulauf
1–2 stilkar blóðberg eða timían
Klaki eftir smekk

Óáfengur sumarkokteill

60 ml eplasafi
30 ml límónusafi
10 ml sykur
5–6 basilíkulauf
5–6 myntulauf
1–2 stilkar blóðberg eða timían
Fyllt upp með sódavatni
Klaki eftir smekk

Hvernig skal gera heimagerðan rabarbara bitter?

Róbert tók bita af ferskum rabarbara úr garðinum sínum og lét hann liggja í hreinum vodka í þrjár vikur í lokaðri krukku í stofunni heima hjá sér. Tvisvar, þrisvar á dag hristi hann síðan blönduna.