Staðarvinnustofur í Loftslagsvænum landbúnaði

Um þessar mundir er verið að halda staðarvinnustofur í verkefninu Loftslagsvænn landbúnaður en þær hafa verið haldnar á hverju ári frá upphafi verkefnisins og verið mikilvægur hluti þess. Vinnustofurnar eru haldnar á einu þátttökubúanna, þar koma þátttakendur saman og skoða hvað ábúendur gera til að ná árangri í þeim þáttum sem þeir leggja áherslu á í verkefninu. Markmiðið með þessum vinnustofum er að þátttakendur fái að hittast og deila með hver öðrum reynslu og þekkingu.

Fyrirkomulag vinnustofanna í ár er aðeins frábrugðið því sem áður hefur verið, þær eru einfaldari í sniðum og boðið er upp á fleiri möguleika til að auka fjölbreytni þeirra viðfangsefna sem ræða á hverju sinni. Með þessu fyrirkomulagi geta þátttökubændur valið að mæta á þá vinnustofu sem hentar þeim best, annaðhvort vegna fjarlægðar frá heimili, en einnig eftir því hvernig viðfangsefnið hentar þeirra búrekstri eða því sem vekur hjá þeim mestan áhuga. Í júní er boðið upp á þrjár vinnustofur. Sú fyrsta var haldin 2. júní að Bessastöðum í Hrútafirði, 5. júní var vinnustofa í Heiðarbæ 1 í Þingvallasveit og síðasta staðarvinnustofan í þessari lotu verður haldin á Egilsstöðum í Fljótsdal 16. júní. Þátttaka í staðarvinnustofum er skilyrði fyrir fullum þátttökustyrk fyrir tvo yngstu hópana og þátttakendur mega taka þátt í fleirum en einni vinnustofu. Gert er ráð fyrir að fleiri staðarvinnustofur verði haldnar seinna í sumar til að auka fjölbreytni og til að gefa sem flestum tækifæri á að taka þátt.

Að auki við staðarvinnustofurnar var haldin vinnustofa 4. júní á Hvanneyri sem er hluti af verkefninu „Landbrugssamarbedje“. Þar er um að ræða samstarfsverkefni Íslendinga, Grænlendinga og Færeyinga og er það styrkt af NORA, sjóði sem er stýrður af Norrænu ráðherranefndinni. Markmið þessa verkefnis er að efla samskipti milli bænda í fyrrnefndum löndum og efla þannig miðlun þekkingar í landbúnaði og í umhverfis- og loftslagsmálum. Nokkrir bændur í Loftslagsvænum landbúnaði tóku þátt í þeirri vinnustofu, auk færeyskra bænda en því miður komust grænlenskir bændur ekki á vinnustofuna vegna þess að flug var fellt niður. Færeyingarnir tóku líka þátt í staðarvinnustofunni í Heiðarbæ, þar mættu líka nokkrir Írar sem eru nemendur í námi í sjálfbærum landbúnaði en þeir voru hér í námsferð. Vinnustofan fór fram á ensku sem virtist ekki hafa neikvæð áhrif heldur jók það á fjölbreytni umræðunnar.

Allar vinnustofurnar tókust vel og þátttakendur áttu saman góða daga en nánar verður gerð grein fyrir hverri staðarvinnustofu fyrir sig og NORA-vinnustofunni seinna í sumar.