Skógræktarátak

„Við erum auðvitað svolítið stórhuga að ætla okkur að planta 50.000 trjám árlega,“ segir Hildur Björnsdóttir, borgarstjóri Reykjavíkur, um skógræktarátak borgarinnar sem er nýhafið.

Tilhneiging hefur verið að ýta gróðri út í jaðrana við þéttingu byggðar og krónuþekjan á höfuð- borgarsvæðinu hefur minnkað á undanförnum árum. Breyting kann að verða þar á. Borgarstjóri segir þurfa að leita leiða til að undirstrika tengingu við náttúruna.

Jákvæð áhrif þess að vera innan um tré

Eitt af verkefnum nýrrar borgarstjórnar í Reykjavík er að hefja átak í skógrækt með leik- og grunnskólabörnum og tryggja sumarstörf fyrir ungmenni í samstarfi við Skógræktarfélag Reykjavíkur. „Við erum auðvitað svolítið stórhuga að ætla okkur að planta 50.000 trjám árlega. En það eru auðvitað margar rannsóknir sem sýna fram á mikilvægi þess og jákvæð áhrif þess að vera innan um tré,“ segir Hildur Björnsdóttir, borgarstjóri í Reykjavík, í kynningarmyndbandi borgarinnar um skógræktarátakið.

„Ég held í öllum hverfum þurfum við að leita leiða til að undirstrika tenginguna við náttúruna og það er missnúið, sumir búa nálægt fjöru og aðrir ekki. Tré geta verið lykilþáttur í því,“ segir Hildur í myndbandinu. Á verkefnalista borgarstjórnar er talað um að planta 50.000 trjám á kjörtímabilinu og óvíst hvort markmiðið er 50.000 eða 200.000 tré.

Ísland er eftirbátur Norðurlandanna

Tilhneiging hefur verið að ýta gróðri út í jaðrana við þéttingu byggðar og krónuþekja Reykjavíkur hefur minnkað á undanförnum árum. Breyting kann að verða á þeirri þróun með átakinu.

Samnorræna verkefnið Yggdrasill – hin lifandi norræna borg miðar að því að efla náttúrumiðaðar lausnir í borgum og sveitarfélögum á Norðurlöndunum. Það byggir á meginreglunni um 3+30+300 um trjárækt og grænar lausnir, þar sem allir borgarar ættu að geta séð þrjú stór tré frá heimili sínu, skóla, vinnustað eða dvalarstað; með að minnsta kosti 30 prósent laufþekju í hverju hverfi og enginn ætti að búa í meira en 300 metra fjarlægð frá grænu (og vönduðu) almennu svæði. Í verkefninu var gerð úttekt á þessum þáttum í borgum og bæjum Norðurlandanna og að Grænlandi undanskildu er Ísland alger eftirbátur hinna Norðurlandanna. Í skýrslu Yggdrasils er fjallað um leiðir til að samþætta 3+30+300 við stefnumótun og áætlanagerð sveitarfélaga.

Aukið samstarf Skógræktarinnar og Reykjavíkurborgar

Borgarstjóri og forseti borgarstjórnar funduðu með framkvæmdastjóra og stjórnarformanni Skógræktarfélags Reykjavíkur um aukið samstarf í lok júlí. Skógræktarfélag Reykjavíkur er 125 ára á árinu. Liður í samstarfinu er lifandi sýning sem sett var upp í Ráðhúsi Reykjavíkur á menningarnótt.

Angan af skógi fyllti Ráðhúsið og nóg var að sýsla fyrir gesti. Fjölþætt upplifun af því að vera í skógi var dregin fram með skógarbaði og seiðandi tónum, kennt var að tálga, krakkar gengu um á trjástultum og hægt var að gæða sér á ketilkaffi og ylja sér við varðeld úti fyrir þar sem skógarhöggsmenn voru að störfum. Ljósmyndasafn Skógræktarfélagsins var gefið Ljósmyndasafni Reykjavíkur og ljósmyndir og myndasýning á tjaldi prýddu Ráðhúsið. Myndirnar báru ríkulegu starfi Skógræktarfélags Reykjavíkur glöggt vitni.