Skógardagurinn mikli

Við Lagarfljót undir vökulu auga Snæfells dafnar einn tilkomumesti skógur landsins.

Hallormsstaður er rómaður fyrir náttúrutöfra þar sem andagiftin og rómantíkin eiga sér bólstað. Þar vaxa tignarleg tré sem mynda skógarparadís sem löngu er orðin landsþekkt. Í góðum félagsskap, álfa, vætta (Lagarfljótsormurinn vitanlega) og manna um Jónsmessuhátíðina gera bændur á Fljótsdalshéraði upp árið með veislu sem þeir kalla Skógardagurinn mikli.

Það er fyrir tilstilli skógræktenda á Héraði að skógardagurinn er haldinn og allar götur frá 2005 hefur hátíðin farið fram.

Að samkomunni standa Skógræktin, Félag skógarbænda á Austurlandi ásamt félögum sauðfjár- og kúabænda á Héraði og fjörðunum. Ævinlega er margt um manninn en gestir hátíðarinnar hafa verið yfir 2.000 manns. Því er gott að nýta sætafjöldann í bílunum sem mest fyrir þá sem koma lengra að en þeir sem þegar eru í gistingu á Hallormsstað, hvort sem er í tjaldi eða í hóteligistingu.

Margt er að sjá og upplifa. Orka skógarins skilar sér til gesta. Sem og er orka kókómjólkurinnar kærkomin en þess má geta að hún fagnar 50 ára afmæli sínu um þessar mundir. Rótgrónir viðburðir, eins og skógarhöggskeppnin, verður á sínum stað og yngsta kynslóðin mun hafa nóg fyrir stafni í ýmsum þrautum og leikjum.

Bændur af Héraði bjóða upp á heilgrillað naut og lamb og ýmsar aðrar veitingar, svo sem lummur og ketilkaffi.

Allir eru velkomnir í Hallormsstað á Skógardaginn mikla sem hefst á hádegi með leikjum og gleði fyrir börnin. Formleg dagskrá hefst kl 13.00, laugardaginn 24. júní 2023.