Skáldið, framsóknarmaðurinn og fimm granda meldingin

Þeir voru ekki margir sem komust í slemmu með spil austur-vestur á Kjördæmamótinu sem kannski sætir furðu þar sem sjö tíglar standa án vandkvæða.

Spilarar á kjördæmamótum eru þekktir fyrir að melda mikið á spilin sín en flest pör spiluðu 3 grönd eða fimm tígla.

Umsjónarmaður Briddsþáttar Bændablaðsins, sem frá og með deginum í dag er hleypt af stokkunum, var meðal spilara á mótinu sem misstu af slemmunni.

Við mitt borð laumaðist suður til að opna létt á einu hjarta, ég doblaði, norður sagði pass og makker minn í austur stökk í þrjú grönd. Þar dóu sagnir. Við makker vorum sammála í umræðu eftir spilið að hann hefði kannski átt að melda 2 hjörtu en lausnin er ekki auðfundin.

En eitt par meldaði mjög skilvirkt á spilin sín, skáldið Þorsteinn Bergsson úr liði Austurlands og framsóknarmaðurinn Magnús Ásgrímsson.

Þorsteinn var með 4054-skiptinguna og opnaði á einum precision tígli. Makker sagði hjarta, nú laumaði suður inn tveimur spöðum – sennilega ekki til útspils. Þorsteinn meldaði tvö lauf og eftir pass norðurs vissi Magnús af níu spilum eða fleirum í láglitum hjá Steina skáldi og taldi kannski líklegra að spaði kæmi út en hjarta! Hann meldaði 5 grönd sem þýddi: Veldu slemmu, makker minn. Þorsteinn valdi og meldaði sex tígla. Rúsínan í pylsuendanum var að samningurinn var doblaður – plús einn.

Kjördæmamótið er bráðskemmtilegt mót og þekkt fyrir þátttöku bændahöfðingja og skrautlegra liðsmanna úr sveitum landsins. Komu um 150 spilarar af öllu landinu saman og skemmtu sér ýmist með eigin heilafrumum eða tónlist og öðru.

Sveit Norðurlands eystra bar sigur úr býtum undir stjórn Stefáns Vilhjálmssonar fyrirliða.

Bikarkeppnin fram undan

Eitt skemmtilegasta mót hvers árs hefst bráðlega – bikarkeppni Bridgesambands Íslands.

Í bikarnum er hreinn útsláttur. Sú sveit sem skorar fleiri impa í 40 spilum heldur áfram keppni og fara lokaúrslit fram síðsumars.

Margar skemmtilegar sögur hafa verið sagðar af heimaleikjum sem í góðu briddsári þegar þátttaka er góð fara fram um land allt.

Aðalsteinn Jörgensen heimsmeistari hefur rifjað upp gestrisni og ýmis ævintýri sem hann hefur ratað í þegar hans lið hefur dregist gegn sveitum úti á landi. Stundum detta lítil lið í lukkupottinn þegar þau dragast gegn bestu spilurum landsins og kemur sér þá vel að bridds er fyrst og fremst félagsleg skemmtun.

Horfur eru á að Bændablaðið og Bridgesamband Íslands taki upp samstarf vegna bikarkeppninnar.

Spilarar sem ferðast um landið vegna bikarkeppninnar mættu hafa í huga að senda umsjónarmanni Briddsþáttar Bændablaðsins áhugaverð spil eða myndir af viðureignum eða léttum augnablikum í pósti.