Skæð fuglaflensa aftur komin á kreik

Fuglainflúensa hefur greinst í villtum fuglum, nú við Blönduós og á Sauðárkróki.

Skæð fuglainflúensa af gerðinni H5N5 hefur greinst í villtum máfum og andfuglum á norðvesturhluta landsins og er því aukin smithætta fyrir alifugla og aðra fugla í haldi frá villtum fuglum.

Fyrir skömmu fundust á annan tug stormmáfa og hettumáfa dauðir í fjöru við Blönduós. Sýni voru tekin og í þeim greindist skæð fuglainflúensa af gerðinni H5N5. Sama gerð skæðrar fuglainflúensu H5N5 greindist einnig í önd sem fannst dauð á Sauðárkróki á dögunum. Smitið var staðfest af Tilraunastöð HÍ í meinafræði á Keldum í kjölfarið. Þetta kemur fram í tilkynningu frá Matvælastofnun.

Varkárni sé viðhöfð

Um er að ræða fyrstu staðfestu smitin þetta haustið. Þessi gerð fuglainflúensuveiru, HPAI H5N5, greindist einnig hérlendis síðasta vetur. Segir að óljóst sé hvort fuglarnir á Blönduósi hafi smitast af farfuglum eða hvort smit hafi leynst í villta íslenska fuglastofninum síðan í vor. Á þessu stigi máls sé jafnframt lítið vitað um útbreiðslu.

Áhættumatshópur muni endurmeta smithættu fyrir alifugla og aðra fugla í haldi í ljósi þessara greininga, en ljóst sé að fuglaeigendur þurfi að tryggja öflugar smitvarnir við umgengni á sínum fuglahópum og vera vel vakandi fyrir sjúkdómseinkennum í fuglum eða óeðlilegum dauða í þeim.

Tilkynna um veika og dauða fugla

Veiðimenn eru hvattir til að sýna varkárni við veiðar og verkun villtra fugla. Ekki skal veiða fugla og nýta til matar sem haga sér óeðlilega eða eru sjáanlega veikir/slappir. Fuglar sem virðast heilbrigðir geta líka verið smitaðir af fuglainflúensu. Matvælastofnun hefur gefið út leiðbeiningar fyrir veiðimenn um meðhöndlun allra veiddra fugla á tímum fuglainflúensu.

Tilkynna skal tafarlaust til Matvælastofnunar ef grunur vaknar um óvenjuleg veikindi eða dauðsföll meðal fugla.

Þá er verið að rannsaka hvort orsakasamhengi sé milli fuglaflensu og nokkurra hvala, andanefja og hnúfubaks, sem undanfarið hefur rekið á fjörur allt frá norðanverðum Vestfjörðum til Öxarfjarðar.