Reynt að bjarga rekstrinum

Rekstur Hótel Sögu er erfiður og allt bendir til að fyrir­tækið fari í tímabundnar heimild­ir til fjárhagslegrar endur­skipu­lagningar atvinnu­fyrirtækja nái frumvarp Áslaugar Örnu Sigur­björnsdóttur dóms­mála­ráðherra fram að ganga.

Gunnar Þorgeirsson, formaður Bænda­samtakanna, segir að aðgerðir til að bjarga rekstri hótelsins séu spurning um líf eða dauða Hótel Sögu.

Gunnar segir að það sem sé efst á baugi hvað varðar Hótel Sögu sé að koma rekstrinum í skjól.

„Það er grundvallað á lagafrumvarpi sem liggur fyrir Alþingi og við eygjum von í að verði að lögum í vikunni. Verði frumvarpið að lögun jafngildir það greiðslustöðvun fyrir reksturinn sem hægt verður að sækja um í þrjá mánuði til að byrja með og á sama tíma er settur tilsjónarmaður með rekstrinum meðan á greiðslustöðvuninni stendur.

Við vonum að þriggja mánaða skjól muni hjálpa okkur til að sjá hver þróunin í ferðamálum verður og horfum til þess að sjá hver þróunin verður eftir 15. júní eftir að landið opnast og hvað gerist í raun.“

Aukning í hlutafé

Ein þeirra leiða sem stjórnendur Hótel Sögu hafa viðrað er að auka hlutafé í rekstrinum. Gunnar segir að eins og staðan sé í dag verði að leita allra leiða til að tryggja hagsmuni Bændasamtakanna í eigninni Bændahöllin ehf. og rétta reksturinn af. Það sé ekki einfalt verk að auka hlutaféð á meðan takmarkað aðgengi sé að landinu.

„Áhugi á hlutabréfum í rekstrinum hefur ekki verið mikill en það hefur verið sýndur áhugi á að kaupa hótelið í heilu lagi. „Það hefur samt ekki komið formlegt tilboð og ekkert í hendi með það. Við þurfum einnig að eiga samtal við okkar helstu lánardrottna áður en nokkrar ákvarðanir um sölu eru teknar.“

Reynt að tryggja launagreiðslur og takmarkaðan rekstur

„Hótelið er á hlutabótaleið með launagreiðslur og leiðin gerir ráð fyrir að ferðaþjónustufyrirtæki fjármagni 100% laun og fái endurbætur frá ríkinu af 85% launa eftir 30 daga. Hluti af rekstrarvanda hótelsins núna er að brúa það bil og tryggja takmarkaðan rekstur í mánuð til viðbótar,“ segir Gunnar  Þorgeirsson, formaður Bændasamtaka Íslands.