Reykjagarður stækkar um 4.000 fermetra
Það er mikið um að vera hjá Reykjagarði á Hellu því þar er verið að byggja fjögur þúsund fermetra húsnæði við núverandi húsnæði á staðnum.
Í nýja húsinu verður hlutun, úrbeining, fullvinnsla, eldun, frystar, kælar, afgreiðsla, úrgangs- og tæknirými. Heildarfjárfesting í nýja húsnæðinu og vélbúnaði er áætluð um 2,8 milljarðar króna. „Nú er unnið að uppsetningu sökkla, veggja og þaks á viðbyggingu við vinnslu okkar á Hellu. Sökklar og veggir eru úr forsteyptum einingum frá BM Vallá, sem jafnframt er aðalverktaki á byggingunni. Með þeim vinna svo Límtré-Vírnet sem leggur til burðarvirki og klæðningu á þak ásamt útihurðum. Uppsetningu hússins annast Kári Arnórsson ehf.
Jarðvinna er í höndum Þjótanda ehf. og heimamenn munu hafa yfirumsjón með raf- og pípulögnum,“ segir Guðmundur Svavarsson, framkvæmdastjóri Reykjagarðs, og bætir við. „Þetta er alls um 4.000 fermetra stækkun en á móti verða seldir um 1.000 fermetrar í Garðabæ. Við teljum mikið hagræði af þessu. Starfsemi, sem í dag er rekin á tveimur hæðum við mikil þrengsli á Hellu og öll starfsemi í Garðabæ, færist nú á eitt gólf undir einu þaki. Samhliða verður mestur hluti vélbúnaðar endurnýjaður.“
Guðmundur segir að starfsemin á Hellu sé löngu sprungin. „Ég ímynda mér að þegar núverandi húsnæði var byggt hafi framleiðslan verið innan við tíundi hluti þess sem nú er framleitt. Megnið af okkar eldisbúskap er í Rangárvallasýslu og þar af leiðandi liggur vel við að hafa slátrun og úrvinnslu á Hellu. Auk þess eigum við í góðu samstarfi við sveitarfélagið varðandi lóða- og skipulagsmál, sem í raun var forsenda þess að hægt væri að ráðast í verkefnið. Hér er líka gott mannlíf og gott starfsfólk sem ílengst hefur í starfi,“ segir Guðmundur, alsæll með starfsemina á Hellu og nýju bygginguna sem er nú verið að byggja.
