Rekja má 30-40% orkunotkunar og útblásturs til byggingariðnaðarins

Tölur sýna að rekja má um helming allrar auðlindanýtingar og allt að 30-40% orkunotkunar og útblásturs til byggingariðnaðarins, sem gerir hann að þeim iðnaði sem losar mest af gróðurhúsalofttegundum á heimsvísu. Þetta kemur fram í viðtali við Þórhildi Fjólu Kristjánsdóttur, orku- og umhverfisverkfræðing og framkvæmdastjóra Grænni byggðar, í hlaðvarpsþættinum Skeggrætt með Áskeli Þórissyni.

Grænni byggð er vettvangur um sjálfbæra þróun byggðar. Um er að ræða félagasamtök sem rekin eru án hagnaðarmarkmiðs og starfa sem partur af alþjóðlega tengslanetinu World Green Building Council sem 70 ríki víðsvegar um heim eru partur af. Þórhildur er með doktorspróf í kolefnisjöfnuðum byggingum frá Tækniháskólanum í Þrándheimi og hefur víðtæka reynslu af vinnu við umhverfismál.

Starf Grænni byggðar felst m.a. í því að koma á tengslum á milli félaga, fræðslu og hvatningu. Samtökin verða 10 ára á þessu ári. Tæplega 50 aðilar í byggingariðnaði eru félagar í Grænni byggð. Á félagaskrá má m.a. finna verktaka, verkfræðistofur og opinberar stofnanir.

„Það er mjög mikilvægt fyrir vistvæna framtíð að huga vel að byggingum og vistvænu skipulagi svo við náum markmiðum í samdrætti í losun,” segir Þórhildur og hún kallar eftir “vegvísi” til að auðvelda byggingaiðnaðinum að verða umhverfisvænni.

Á vef Grænni byggðar, www.graennibyggd.is, má finna fjölbreyttar upplýsingar með því að smella hér.

Þátturinn Skeggrætt með Áskeli Þórissyni er aðgengilegur hér í spilaranum undir og á öllum helstu hlaðvarpsveitum.